សមាជិកក្រុម Manchester United និង Watford បានលើកស្លាកបញ្ហាពីការមិនពេញចិត្ត និងប្រឆាំងចំពោះប្រទេសរុស្ស៊ី ដែលបានសម្រេចចិត្តវាយលុកចូលប្រទេសអ៊ុយក្រែនកាលពីពេលថ្មីៗនេះ។
វិស័យបាល់ទាត់កំពុងដើរមុខគេដើម្បីបង្ហាញពីការតវ៉ាប្រឆាំងការសម្រេចចិត្តរបស់រុស្ស៊ីដែលលើកទ័ពមកធ្វើសង្គ្រាមនៅអ៊ុយក្រែន។ សឹងតែគ្រប់ការប្រកួតទៅហើយនៅពេលនេះ សុទ្ធតែមានស្លាកបង្ហាញពីការមិនពេញចិត្តចំពោះការចង់ធ្វើសង្គ្រាមរបស់រុស្ស៊ី ហើយក៏ស្នើសុំឱ្យមានការចរចាគ្នាឱ្យបានឆាប់រហ័សផងដែរ។ ខណៈដែលពេលនេះ ទ័ពរុស្ស៊ីកំពុងវាយលុកទៅមុខ កៀកនឹងយកបានទីក្រុងគៀវទៅហើយ។
នៅទឹកដី Old Trafford យប់មិញក៏មិនខុសពីកន្លែងផ្សេងៗដែរ។ ទាំងកីឡាករ Man Utd និង Watford សុទ្ធតែបង្ហាញពីការចង់បានសន្ដិភាព មិនចង់ឱ្យមានសង្គ្រាមកើតឡើងនោះទេ មិនថានៅអ៊ុយក្រែន ឬប្រទេសណាទេ។ សង្គ្រាម មិនមែនជាអ្វីដែលគ្រប់គ្នាចង់បានឡើយ៕ប្រភព Dailymail
