ការប្រកួតពានរង្វាន់អឺរ៉ុប UEFA Champions League ទើបតែបានបញ្ចប់នូវវគ្គចែកពូល ជុំទី ៥ ដែលមានន័យថា នៅសល់តែ ១ ជុំទៀតប៉ុណ្ណោះ មុនកាត់សេចក្តីរកឃើញក្រុមត្រូវឡើងទៅកាន់វគ្គបន្ទាប់ ក្រុមធ្លាក់ទៅ Europa League ក៏ដូចជាក្រុមដែលអស់ឱកាសក្នុងការប្រជែង នៅរដូវកាលនេះ។
យ៉ាងណាគិតក្រោយចប់ ជុំទី ៥ វគ្គចែកពូល យើងក៏បានរកឃើញក្រុមចំនួន ១១ ហើយ ដែលបានកក់កៅអីឡើងទៅកាន់វគ្គបន្ទាប់ ដោយមិនចាំបាច់ខ្វល់ខ្វាយនូវលទ្ធផលនាជុំចុងក្រោយ។ ទំព័រ CTS Sports ធ្វើការសង្ខេបលទ្ធផលតាមពូលនីមួយៗដូចតទៅ៖
ពូល A) បន្ទាប់ពីយកឈ្នះទៅលើ PSG នៅឯទឹកដី Etihad សម្រាប់ក្លឹបមេឃខៀវ Man City បាននាំមុខចំណាត់ថ្នាក់កំពូល ដោយមាន ១២ ពិន្ទុ ខណៈក្លឹបសេដ្ឋីបារាំង មាន ៨ ពិន្ទុ រុញឲ្យពួកគេទាំងពីរ អាចឡើងទៅកាន់វគ្គបន្ទាប់។ នៅជុំចុងក្រោយ សម្រាប់ពូល A គឺគេនៅចាំអុតមើលថា តើរវាង RB Leipzig និង Club Brugge ដែលកំពុងមាន ៤ ពិន្ទុស្មើ ក្រុមណាមួយ នឹងសល់ឱកាសទៅលេងនៅ UEL?
ពូល B) ៥ ប្រកួត Liverpool ឈ្នះទាំង ៥ សម្រេចឲ្យពួកគេ អាចធានាកៅអីឆ្ពោះទៅកាន់វគ្គបន្ទាប់ ខណៈដែល FC Porto មាន ៥ ពិន្ទុ AC Milan និង Atletico Madrid មាន ៤ ពិន្ទុ នៅជុំចុងក្រោយ ពួកគេនឹងត្រូវប្រជែងគ្នា ហើយមានតែមួយក្រុមប៉ុណ្ណោះ អាចឡើងទៅកាន់វគ្គ ១៦ ក្រុម ខណៈ ២ ក្រុមផ្សេងទៀត មាន ១ ត្រូវធ្លាក់ទៅលេងនៅ Europa League។ នេះគេកំពុងអុតមើល ថាតើ AT Madrid ធ្លាប់តែជាក្រុមខ្លាំងមួយនៅតំបន់អឺរ៉ុប អាចឆ្លងផុតបានដែរឬយ៉ាងណា?
ពូល C) Ajax ខ្លាំងមិនចាញ់ Liverpool ដោយមាន ១៥ ពិន្ទុពេញ ជាក្រុមដែលធានាកៅអី ១០០ ភាគរយ ជាមួយនឹងក្លឹប Sporting CP ក្នុងការឆ្ពោះទៅកាន់វគ្គបន្ទាប់។ សម្រាប់ពូលនេះ មើលទៅដូចជាអស់អ្វីត្រូវមើលហើយ ព្រោះ Dortmund ក៏ច្បាស់លាស់រួចហើយដែរថានឹងត្រូវធ្លាក់ទៅលេងនៅ UEL ខណៈ Besiktas មាន ០ ពិន្ទុ គឺអស់ឱកាសទាំងស្រុង។
ពូល D) Real Madrid និង Inter Milan ដែលមានគម្លាត ២ ពិន្ទុ បានសម្រេចដឹកដៃគ្នា ឆ្ពោះទៅកាន់វគ្គ ១៦ ក្រុម ខណៈ Sheriff Tiraspol ត្រូវធ្លាក់ទៅលេងនៅ UEL ហើយ Shakhtar ដែលមានតែ ១ ពិន្ទុ គឺអស់ឱកាសត្រឹមនេះហើយ។
ពូល E) Bayern Munich មាន ១៥ ពិន្ទុពេញ គេលែងខ្វល់ហើយនៅប្រកួតជុំចុងក្រោយ តែអ្វីដែលបារម្ភបំផុតនោះ គឺ Barcelona ដែលប្រឈមអាចនឹងធ្លាក់ទៅលេងនៅ Europa League ប្រសិនជាជុំចុងក្រោយ មិនអាចទទួលបានជ័យជម្នះ។
មួយផ្សេងទៀតក្រុមដឹកនាំដោយលោក Xavi Hernandez ក៏ពឹងផ្អែកលើលទ្ធផលនៃការប្រកួតរវាង Benfica និង Dynamo Kyiv ប្រសិនគូនេះស្មើ ឬ Benfica ចាញ់ នោះ Barcelona ក៏មិនចាំបាច់ខ្វល់នោះដែរ អំពីលទ្ធផលទល់ Bayern Munich បើទោះបីត្រូវគេហូបទក់សាច់ដូចមុន។
ពូល F) Man Utd ក្រោយយកឈ្នះ Villarreal ពួកគេបានកក់ក្តៅចិត្តហើយក្នុងការឡើងទៅកាន់វគ្គ ១៦ ក្រុម ស្របពេលដែលក្រុមអេស្ប៉ាញ ត្រូវប្រាកដនៅជុំចុងក្រោយ ថាអាចយកឈ្នះ ឬស្មើជាចាំបាច់ នៅពេលប្រកួតទល់ Atalanta។ ប្រសិនចាញ់នោះ Villarreal នឹងត្រូវធ្លាក់ទៅ Europa League។
ពូល G) នៅពូល G គឺស្មុគស្មាញខ្លាំងជាង ដោយចំណោមក្រុមទាំង ៤ មិនទាន់រកឃើញសូម្បីមួយនៅក្រុមដែលត្រូវឡើងទៅកាន់វគ្គបន្ទាប់។ សម្រាប់ Wolfsburg ដែលឈរនៅបាតពូល គឺអស់ឱកាសហើយ ខណៈ Lille, RB Salzburg និង Sevilla នឹងត្រូវប្រជែងគ្នាយក ២ កៅអី ឆ្ពោះទៅវគ្គ ១៦ ក្រុម ហើយសល់ ១ កៅអីធ្លាក់ទៅ Europa League។
ពូល H) Chelsea និង Juventus មាន ១២ ពិន្ទុស្មើ ក៏រុញឲ្យពួកគេ បានឡើងទៅកាន់វគ្គបន្ទាប់ ខណៈ Zenit Saint Petersburg មាន ៤ ពិន្ទុ សម្រេចធ្លាក់ទៅលេងនៅ Europa League ហើយ Malmo ដែលមានតែ ១ ពិន្ទុគឺអស់ឱកាសហើយ៕