ដូចអ្នកបានដឹងស្រាប់ហើយចន្លោះប្រហោងក្នុងអាជីពរបស់ Lionel Messi ដែលកំពុងជួបប្រទះ គឺការឈ្នះពានរង្វាន់ខ្នាតយក្សនៅក្រុមជម្រើសជាតិ ហើយនោះគឺពាន FIFA World Cup។
បើសួរថា តើដោយសារមូលហេតុអ្វីទៅ? ជាការពិតការលេងលើទីលានគឺទាមទារកីឡាករក្នុងក្រុមទាំង ១១ សហការគ្នាបានល្អ មិនមែនល្អតែ ១-២ នាក់គឺមានន័យថា អាចយកជ័យជម្នះបាននោះទេ។ ហេតុផលហ្នឹងហើយទើបជម្រើសជាតិអាហ្សង់ទីន និងព័រទុយហ្គាល់ជាដើមពិបាកនឹងអាចប្រជែងពាន WC។
យ៉ាងណាតាមការជឿជាក់ពីលោក Oscar Ruggeri អតីតខ្សែការពារនៅក្លឹប Boca Junior និងជម្រើសជាតិអាហ្សង់ទីន និយាយថា ប្រសិនក្រុមមានខ្សែការពារឆ្នើមដូចជា Sergio Ramos នោះ Messi ប្រាកដជាអាចឈ្នះពានបានហើយ។
ប្រាប់ ESPN លោក Ruggeri និយាយ៖ “អាហ្សង់ទីននិង Messi ជាមួយវត្តមាន Ramos គឺស្មើនឹងពាន World Cup ដោយ Ramos គេប្រៀបបាននឹងបិសាចក្នុងពិភពបាល់ទាត់មួយអ៊ីចឹង និយាយទៅបើ Ramos គេនៅតំបន់ការពារ ហើយមានសញ្ជាតអាហ្សង់ទីន នោះក្រុមនឹងអាចឈ្នះជើងឯកបានហើយ”។
លោកបន្ថែមថា៖ “ខ្ញុំពិតជាចង់មានកីឡាករដូចជា Ramos នៅជម្រើសជាតិរបស់ខ្ញុំ ដោយយើងមានខ្សែការពារកណ្តាលល្អហើយ តែមិនមែនល្អបំផុតគ្រប់ពេលវេលានោះទេ ខណៈដែល Ramos គឺគេល្អបំផុតតែម្តង និយាយទៅគេល្អទាំងជាងខ្ញុំទៅទៀត”៕
ប្រភព៖ AF