Alvaro Morata កាលពីពេលថ្មីៗនេះ បានលើកសរសើរមិនដាច់ពីមាត់ដល់តារាឆ្នើម Cristiano Ronaldo និងបង្ហាញពីក្តីសប្បាយរីករាយពេលបានចាប់ដៃគូជាមិត្តរួមក្រុមនៅឯក្លឹប Juventus។
ម្ចាស់ពាន Ballon d’Or ៥ សម័យកាលនៅរដូវកាលទី ៣ ជាមួយក្លឹប Juventus គេរកបាន ១៩ គ្រាប់នៅការបង្ហាញខ្លួន ១៨ ប្រកួត។
នាមជាមិត្តរួមក្រុម សម្រាប់ Morata ក៏បានចូលរួមចំណែក Assist បាល់ជាញឹកញយឲ្យកីឡាករព័រទុយហ្គាល់ខាងលើផងដែរ។ ប្រាប់សារព័ត៌មាន Sky Sport Italia កាលពីពេលកន្លងទៅ Morata និយាយ៖ “វាជារឿងងាយទេក្នុងការលេងជាមួយគាត់ ហើយអាចថាពេលខ្លះខ្ញុំយល់ចិត្តគាត់ច្រើន ដោយដូចនៅប្រកួតប៉ះ Parma ដែលខ្ញុំ Assist បាល់ឲ្យគាត់ គឺគាត់យល់ច្បាស់ដូចគ្នា ហើយខ្ញុំក៏យល់អំពីចង្វាក់នៃការបម្លាស់ទីរបស់គាត់ផងដែរ”។
Morata បន្ថែមទៀតថា៖ “Ronaldo នៅតែជាកីឡាករល្អបំផុតមួយក្នុងប្រវត្តិសាស្រ្ត ហើយនេះគឺជាក្តីរីករាយសម្រាប់ខ្ញុំ ដែលខ្ញុំធំធាត់ឡើងអាចមើលគាត់លេង ហើយពេលនេះបានលេងជាមួយគាត់និង Dybala ដោយពួកគេជាកីឡាករស្ថិតនៅកម្រិតខ្ពស់ ហើយយើងក៏មានទំនាក់ទំនងល្អជាមួយគ្នាទាំងនៅក្រៅទីលានដូចគ្នា”៕
ប្រភព៖ GiveMeSport