ក្លឹប Tottenham Hotspur បានយកឈ្នះទៅលើ Brentford ២-០ ដូចគ្នាទៅនឹងក្លឹប Man City ដែលបានយកឈ្នះ Man Utd នៅឯកីឡដ្ឋាន Old Trafford។
បែបនេះនៅវគ្គផ្ដាច់ព្រ័ត្រពាន EFL Cup ឆ្នាំ ២០២១ នឹងកំណត់ការជួបគ្នារវាងក្លឹប Tottenham និង Man City ដែលធ្វើឡើងនៅវេលាម៉ោង ១០:០០ នាទីយប់ ថ្ងៃទី ២៥ មេសា មានផ្សាយផ្ទាល់លើទំព័រ CTS Sports។
សម្រាប់ក្រុមដឹកនាំដោយលោក Pep Guardiola ដូចអ្នកបានដឹងស្រាប់ហើយ គឺពួកគេឈ្នះពាន EFL Cup ៣ ឆ្នាំជាប់គ្នារាប់តាំងពីឆ្នាំ ២០១៨។ ដោយឡែកសម្រាប់ Spurs ឯណោះវិញ លើកចុងក្រោយដែលពួកគេឈ្នះពាន EFL Cup ក៏ជាលើកចុងក្រោយនៃជ័យជម្នះសម្រាប់ពានរង្វាន់ទាំងអស់របស់ក្លឹបដែរ។
Tottenham បានខកខានស្គាល់រសជាតិឈ្នះពានអស់រយៈពេលជិត ១៣ ឆ្នាំមកហើយ ដោយលើកចុងក្រោយដែលពួកគេបានលើកពាន គឺនៅព្រឹត្តិការណ៍ EFL Cup កាលពីថ្ងៃទី ២៤ កុម្ភៈ ឆ្នាំ ២០០៨។ កាលនោះពួកគេបានប្រកួតយ៉ាងស្វិតស្វាញជាមួយក្លឹបតោខៀវ Chelsea ដោយបញ្ចប់ ៩០ នាទីបានត្រឹមលទ្ធផលស្មើ ១-១ លុះរហូតដល់ការបន្ថែមម៉ោង ១៥ នាទីពីរដង ទើបមានគ្រាប់បាល់ជ័យជម្នះធ្វើបានដោយកីឡាករ Jonathan Woodgate។
យ៉ាងណាមិញសម្រាប់ការប្រកួតនៅឆ្នាំ ២០២១ នេះ ក្រៅពីជាឱកាសសម្រាប់លោក Mourinho បង្កើតកេរឈ្មោះលើកពានលើកដំបូងជាមួយ Spurs វាក៏ជាពេលវេលាដ៏សក្តិសមសម្រាប់តារាឆ្នើម Harry Kane ដែលឈរជើងនៅ Spurs ជិត ១០ ឆ្នាំ តែមិនទាន់ឈ្នះពានសូម្បីតែមួយ៕