ខ្សែបម្រើ Mesut Ozil កាន់តែកៀកមែនទែនហើយ ក្នុងការផ្លាស់ទៅលេងនៅក្លឹប DC United របស់អាមេរិក ក្រោយពីការចរចាចាប់ផ្ដើមយ៉ាងរលូន។
កីឡាករអាល្លឺម៉ង់ខាងលើនេះ មិនមានឈ្មោះលេងឱ្យក្រុម Arsenal ទេតាំងពីដើមរដូវកាលមក ដោយត្រូវលោក Arteta ដកឈ្មោះចេញពីបញ្ជីត្រូវប្រើប្រាស់។ យ៉ាងណាមិញ ដោយសារតែជាប់កុងត្រា រូបគេនៅតែស្ថិតក្រោមការគ្រប់គ្រងរបស់កាំភ្លើងធំដដែល និងបើកប្រាក់ឈ្នួលជាធម្មតា។ តែនៅខែមករានេះ គេជឿថានឹងមានការប្រែប្រួលមិនខាន។
DC United របស់អាមេរិក សង្ឃឹមយ៉ាងម៉ត់មាំថាពួកគេអាចយកអតីតកីឡាករ Real Madrid ខាងលើនេះមកបាន ក្រោយពីយល់ព្រមលក្ខខណ្ឌផ្ទាល់ខ្លួនរួចហើយ។ ខណៈដែលក្លឹបធំនៅអាមេរិកនេះ ក៏ធ្លាប់យកកីឡាករឆ្នើមនៅអង់គ្លេស Wayne Rooney មករួមក្រុមផងដែរកាលពីឆ្នាំ២០១៨កន្លងទៅ៕
ប្រភព៖ Marca