ក្លឹបយក្ស Barcelona បានរងបរាជ័យក្រោមថ្វីជើងរបស់ Atletico Madrid នៅជុំទី ៨ ក្នុងក្របខ័ណ្ឌ LaLiga កាលពីព្រឹកថ្ងៃអាទិត្យ។ ការបាត់បង់ ៣ ពិន្ទុនេះ បានរុញឲ្យឈ្មោះរបស់អ្នកមានបុណ្យធ្លាក់ទៅក្នុងកំណត់ត្រាអាក្រក់ខកខានកើតមានអស់រយៈពេល ២៥ ឆ្នាំ។
៨ ប្រកួតដំបូង ក្រុមស្ថិតនៅតំបន់កាតាឡាន់រកបានតែ ១១ ពិន្ទុប៉ុណ្ណោះ ឈរលេខរៀងទី ១០ ក្នុងតារាង តាមរយៈការឈ្នះ ៣ ស្មើ ២ និងចាញ់ ៣។ ការបាត់បង់ពិន្ទុដ៏ច្រើនបែបនេះ ធ្លាប់កើតមានម្តងនៅរដូវកាល ១៩៩៥/៩៦ ហើយនៅឆ្នាំ ២០២០ វាបានកើតឡើងសារជាថ្មីម្តងទៀតហើយ។
នេះជាការស្វាគមន៍ដ៏អាក្រក់មួយ សម្រាប់អ្នកចាត់ការថ្មីលោក Ronald Koeman ហើយប្រវត្តិច្រំដែលរបស់ Barcelona ដែលយកបានពិន្ទុទាបនៅ ៨ ជុំដំបូង ក៏ធ្លាប់កើតមានស្រដៀងគ្នា ពីរលើកផ្សេងទៀតនៅរដូវកាល ២០០២/០៣ និង ២០០៣/០៤។
កាលនោះនៅ ៨ ប្រកួតដំបូង ពួកគេឈ្នះ ៣ ស្មើ ៣ និងចាញ់ ២ ហើយយកបាន ១២ ពិន្ទុ ដែលខ្ពស់ជាង ១ ពិន្ទុធៀបនឹងកំណត់ត្រាអាក្រក់នៅពេលបច្ចុប្បន្ន។
ការធ្លាក់ចុះយ៉ាងគំហុកនេះត្រូវបានគេមើលឃើញថា ពិបាកនឹងអាចងើបមកវិញខ្លាំងណាស់ ព្រោះកីឡាករសំខាន់ ២ រូបមានដូចជា Gerard Pique និង Ansu Fati កំពុងសម្រាកព្យាបាលរបួស ត្រូវចាយពេលច្រើនខែ។ ហេតុផលមួយផ្សេងទៀតគឺស្ថានភាពរង្គោះរង្គើរបស់ក្លឹប ទាំងកញ្ចប់ចំណាយលើថ្លៃពលកម្មកីឡាករ ក៏ដូចជាការប្រឈមនឹងបាត់បង់តារាឆ្នើម Lionel Messi ដែលកុងត្រាមានសុពលភាពត្រឹមចុងខែមិថុនា ឆ្នាំ ២០២១៕
ប្រភព៖ Marca