Jamie Carragher អតីតកីឡាករជើងចាស់នៅក្លឹបហង្សក្រហម Liverpool បានបង្ហាញការយល់ឃើញថា ក្លឹបម្ចាស់ដី Anfield គួរតែលៃលកចុះហត្ថលេខាយកខ្សែការពារថ្មី ក្រោយពី Virgil van Dijk រងរបួសត្រូវសម្រាករយៈពេលយូរ។
Van Dijk បានរងរបួសធ្ងន់ធ្ងរនិងត្រូវដឹកទៅមន្ទីរពេទ្យភ្លាមៗ កំឡុងការប៉ះទង្គិចជាមួយអ្នកចាំទី Jordan Pickford របស់ក្លឹប Everton។ ប្រភេទរបួស ACL របស់កីឡាករហូឡង់ទំនងជានឹងត្រូវទាមទារពេលសម្រាកសម្រាប់គេដល់បញ្ចប់រដូវកាលឯណោះ។
ប្រាប់សារព័ត៌មាន Sky Sports នៅថ្ងៃអាទិត្យ លោក Carragher និយាយថា៖ “ខ្ញុំគិតថា Liverpool ចាំបាច់ត្រូវតែលៃលកចូលទីផ្សារដោះដូរនៅខែមករា ដោយមិនមែនតែដោយសារ Van Dijk របួសនោះទេ តែខ្ញុំមើលឃើញថា Liverpool ហាក់ចុះខ្សោយនៅប្រព័ន្ធការពារនោះស្រាប់ហើយ”។
បញ្ជាក់ថា ក្រុមការពារជើងឯក Liverpool នៅ ៥ ប្រកួត រកបាន ១០ ពិន្ទុកំពុងឈរចំណាត់ថ្នាក់ទី ៣ នៅតារាង Premier League ដែលកំពុងប្រជែងយ៉ាងប្រកៀកប្រកិតជាមួយ Aston Villa និង Everton៕ ប្រភព៖ Goal