Cristiano Ronaldo ធ្លាប់ពិចារណាគិតចង់ផ្ទេរទៅចូលរួមនៅក្លឹប Paris Saint-Germain មុនកើតមានជំងឺរាតត្បាតទូទាំងសកលលោក COVID-19។ នេះបើតាមរបាយការណ៍ពីសារព័ត៌មាន France Football បានចុះផ្សាយ។
ហេតុផលដែលរុញឲ្យលោកគិតដល់ចំណុចគ្រោងចែកផ្លូវជាមួយ Juventus ក៏ដោយសារទម្រង់លេងរបស់ក្លឹបនៅរដូវកាល ២០១៩/២០ ហាក់មានការធ្លាក់ចុះខ្លាំង។ មួយផ្សេងទៀតក្លឹបសេដ្ឋីបារាំងក៏ធ្លាប់មានបំណងចង់បាន CR7 ដូចគ្នា ពោលគឺដាក់គោលដៅតាំងពីព័រទុយហ្គាល់ឈ្នះពាន Euro ២០១៦ មកម្ល៉េះ។
យ៉ាងណាមិញការគ្រោងទុកទាំងអស់ ត្រូវបានបញ្ចប់ ក្រោយមានជំងឺរាតត្បាត COVID-19 ដែលរុញឲ្យស្ថានភាពហិរញ្ញវត្ថុនៃបណ្តាក្លឹបទាំងអស់ មិនអាចប្រើប្រាស់លុយធំនៅទីផ្សារដោះដូរខាងមុខបានឡើយ មួយផ្សេងទៀតក្រៅពីតម្លៃផ្ទេរ ក្រឡេកទៅមើលតម្លៃពលកម្មក៏ក្លឹបបារាំងត្រូវចាយក្រាស់ក្រែលផងដែរលើ Ronaldo។
ការចង់ចាកចេញរបស់ខ្សែប្រយុទ្ធវ័យ ៣៥ ឆ្នាំ ត្រូវបានគេមើលឃើញថា កាន់តែរសាត់បាត់ចេញពីចិត្ត ជាពិសេសក្រោយពេលដែល Juventus អាចឈ្នះពាន Serie A ៩ រដូវកាលជាប់គ្នាកាលពីពេលថ្មីៗ ហើយស្ថិតិនៃការរកគ្រាប់បាល់របស់លោកក៏ធ្វើបានល្អ ដោយ ៨៨ ប្រកួត រកបាន ៦៣ គ្រាប់ឯណោះ តែសោកស្តាយមិនអាចយកឈ្នះ Immobile នៅកម្រិតប្រជែងពានស្បែកជើងមាសរដូវកាលនេះបាន៕
ប្រភព៖ AF