ជាទូទៅអ្នកស្នេហាវិស័យបាល់ទាត់ ប្រាកដជាអាចបែងចែកច្បាស់រវាងការស៊ុត Free Kick និងការស៊ុតបាល់ពិន័យ ១១ ម៉ែត្រឬយើងហៅថា ប៉េណាល់ទី។
ប៉ុន្តែមានរឿងមួយផ្សេងទៀតដែលជឿថាប្រិយមិត្តអាចជាឆ្ងល់ច្រើន ពាក់ព័ន្ធនឹងការដែលអាជ្ញាកណ្ដាលផ្ដល់បាល់ Free Kick ឲ្យស៊ុតនៅក្នុងប្រអប់គ្រោះថ្នាក់ ជំនួសពីការផ្ដល់ជូនបាល់ប៉េណាល់ទី។ នៅពីក្រោយនោះ តើដោយសារមូលហេតុអ្វីទៅ ហើយការបង្កកំហុសបែបណាខ្លះ ទើបឈានដល់ការពិន័យបែបហ្នឹង?
ភាសាបច្ចេកទេសនៅការផ្តល់ជូនបាល់ស៊ុតមួយនោះ គេហៅថា Indirect Free Kick ពោលគឺខុសពី Direct Free Kick ដែលជាការស៊ុតបាល់ Free Kick ក្រៅប្រអប់គ្រោះថ្នាក់ធម្មតា។ ការស៊ុត Direct Free Kick គឺកីឡាករអាចស៊ុតមួយជើងបញ្ចូលទី ដោយមិនបាច់បញ្ជូនបាល់បាន តែ Indirect Free Kick ទាមទារឲ្យមានការបញ្ជូនបាល់ចេញពីជើងកីឡាករមួយសិន ទើបកីឡាករក្នុងក្រុមមួយផ្សេងទៀតអាចមានសិទ្ធស៊ុតបាល់បញ្ចូលទី អ៊ីចឹងមានន័យថាបើស៊ុតត្រង់មួយជើងចូលទី ក៏អាជ្ញាកណ្ដាលមិនរាប់គ្រាប់នោះឲ្យដែរ។
ពាក់ព័ន្ធនឹងកំហុសដែលអាចឈានដល់ការផ្តល់ជូន Indirect Free Kick ក្នុងប្រអប់គ្រោះថ្នាក់ គឺជាការបង្កកំហុសមិនធ្ងន់ធ្ងរឬអចេតនា មួយផ្សេងទៀតជាការបង្កកំហុសដោយគ្មានការប៉ះទង្គិចរវាងកីឡាករនិងកីឡាករ។
ជាឧទាហរណ៍ ដូចជាការរាំងស្ទះដល់ការស៊ុតបាល់របស់គូបដិបក្ខ តាមរយៈការស្រែកជេរប្រមាថ ឬប្រើប្រាស់ភាសាមិនសមរម្យណាមួយ។ មួយផ្សេងទៀតដូចជាពេលដែលអ្នកចាំទីអូសបន្លាយពេលជ្រុល ដោយមិនទាន់ផ្ដាច់បាល់ចេញពីតំណែងរបស់ខ្លួនលើសរយៈពេល ៦ វិនាទី ខណៈដែលបាល់ប៉ះដៃ ប្រសិនណាអាជ្ញាកណ្ដាលមើលឃើញថាកីឡាករនោះគ្មានចេតនា ក៏អាចរាប់ជាការពិន័យផ្តល់ជូនត្រឹមបាល់ Indirect Free Kick ដូចគ្នា៕
ប្រភព៖ Quora | IndiaTimes