ក្រោយយកឈ្នះលើ Athletic Club ១-០ ក្លឹប Real Madrid បាននាំមុខ ៧ ពិន្ទុទៅលើ Barcelona ប៉ុន្តែត្រឹមប៉ុន្មានម៉ោងក្រោយ អ្នកមានបុណ្យបានបន្ថយសម្ពាធមកវិញ ដោយសល់គម្លាតត្រឹម ៤ ពិន្ទុក្រោយក្រុមរបស់ខ្លួនបានយកឈ្នះដូចគ្នា ទៅលើ Villarreal ៤-១។
មានប្រិយមិត្តជាច្រើនបានចោទសួរ ថាតើ Real Madrid អាចនឹងលើកពាន LaLiga ទី ៣៤ របស់ខ្លួននៅប្រកួតមួយណាដែរ បើការប្រកួតប្រជែងមានភាពតានតឹងខ្លាំងបែបនេះ?
បច្ចុប្បន្ននៅ LaLiga សេសសល់តែ ៤ ជុំទៀតប៉ុណ្ណោះ ហើយផ្អែកតាមលំដាប់ពិន្ទុនាំមុខចំនួន ៤ ពិន្ទុរបស់ Real នោះមាន ៣ លក្ខខណ្ឌដែលស្ដេចសអាចនឹងលើកពាន ដោយកាត់សេចក្ដីត្រឹមជុំទី ៣៦ ឬ ៣៧៖
១) ប្រសិននៅចំណោម ២ ប្រកួតបន្ទាប់របស់ Barcelona ពេលប៉ះ Espanyol (នៅថ្ងៃទី ៩ កក្កដា) និងប៉ះ Valladolid (នៅថ្ងៃទី ១២ កក្កដា) ហើយក្លឹបអ្នកមានបុណ្យអាចរកបានខ្ពស់បំផុតត្រឹម ១ ពិន្ទុ និងស្របពេលដែល Real Madrid បានយកឈ្នះលើ Alaves នៅថ្ងៃទី ១១ កក្កដា នោះម្ចាស់ពាន LaLiga អាចកំណត់បានថានឹងក្លាយជារបស់ Real នៅថ្ងៃអាទិត្យចុងសប្ដាហ៍។ នេះអាចថាជាករណីលឿនបំផុត។
២) ករណីបន្ទាប់គឺ Real Madrid អាចនឹងប្រកាសជាក្រុមឈ្នះពាននៅ ថ្ងៃទី ១៤ កក្កដា ពេលប៉ះ Granada។ ប្រសិនបើជំនួបទល់ Alaves និង Granada ក្លឹប Real Madrid បានទទួលជ័យជម្នះទាំងពីរប្រកួត បែបនេះចាំបាច់ Barca ត្រូវតែយកឈ្នះ ២ ប្រកួតទល់ Espanyol និង Valladolid ដូចគ្នា ពោលបើថ្លោះធ្លោយចាញ់តែមួយប្រកួត នោះ Madrid នឹងក្លាយជាក្រុមឈ្នះពានហើយ។
៣) ករណីមួយផ្សេងទៀតគឺ ប្រសិនណា Barcelona ស្មើនៅប្រកួតទាំងពីរ ពោលគឺទទួលបាន ២ ពិន្ទុពីជំនួបទល់ Espanyol និង Valladolid នោះ Madrid ក៏មិនសូវហត់ ដោយត្រូវការតែ ៤ ពិន្ទុប៉ុណ្ណោះ ពោលអាចស្មើ ១ និង ឈ្នះ ១ ដើម្បីក្លាយជាក្រុមឈ្នះជើងឯក៕
ប្រភព៖ AF