Real Madrid បានយកឈ្នះទៅលើ Athletic Bilbao ក្រោយទទួលបានឱកាសស៊ុតបាល់ពិន័យ ១១ ម៉ែត្រដែលបំបែកបានដោយ Sergio Ramos។
ក្រោយចប់ការប្រកួតនៅឯកីឡដ្ឋាន San Mames អ្នកចាត់ការលោក Zinedine Zidane បានបង្ហាញការមិនពេញចិត្ត ជុំវិញពាក្យសម្តីដែលនិយាយឥតឈប់ថាអាជ្ញាកណ្តាលមានភាពលំអៀងមកកាន់ក្លឹប Real Madrid ច្រើន មិនថាតែក្នុងការប្រកួតណាក៏ដោយ។
និយាយប្រាប់សារព័ត៌មាន អ្នកចាត់ការបារាំងថា៖ “ខ្ញុំហត់នឹងស្តាប់ពាក្យដែលគេថាយើងឈ្នះដោយសារតែអាជ្ញាកណ្តាលណាស់ ដោយវាមិនផ្លាស់ប្តូរអ្វីទាល់តែសោះ តែត្រូវដឹងថាកីឡាករគួរតែទទួលបានការគោរពចំពោះជ័យជម្នះនេះ និយាយទៅគ្មាននរណាម្នាក់ដែលអាចបញ្ឈប់គោលដៅរបស់ក្លឹបយើងបានឡើយ”។
ពាក់ព័ន្ធនឹងការផ្តល់ឲ្យ Ramos ស៊ុតបាល់ ១១ ម៉ែត្រ លោកក៏បានសង្កត់ធ្ងន់៖ “គាត់មានលក្ខណៈពិសេស គាត់បានហ្វឹកហាត់ការស៊ុតបែបនោះជាច្រើន បែបនេះវាជារឿងវិជ្ជមានសម្រាប់ក្រុម”៕
ប្រភព៖ BeSoccer