អ្នកគាំទ្របាល់ទាត់ចាស់ថ្មី ប្រាកដជាស្គាល់ច្បាស់នូវឈ្មោះវីរបុរសក្នុងវិស័យបាល់ទាត់មួយរូបនោះគឺ <<Pele>>។ លោកត្រូវបានគេស្គាល់ជាអតីតកីឡាករបាល់ទាត់ដែលរកបានគ្រាប់បាល់ច្រើនជាង ១ ពាន់គ្រាប់ និងធ្លាប់ឈ្នះពាន World Cup ច្រើនជាងគេបង្អស់ដល់ទៅ ៣ លើកក្នុងអាជីព។
តើនៅពីក្រោយភាពជោគជ័យ និងជាបុគ្គលដែលមានការទទួលស្គាល់ទូទាំងសកលលោក ដំណើរជីវិតរបស់ Pele ធ្លាប់ឆ្លងកាត់រឿងលំបាកបែបណាខ្លះ? តោះទៅតាមដានជាមួយ CTS Sports ដូចតទៅ៖
Edson Arantes do Nascimiento ឬជាប់រហ័សនាម Pele កើតនៅថ្ងៃទី ២៣ តុលា ឆ្នាំ ១៩៤០ ក្នុងទីក្រុង Tres Coracoes ដែលមានចម្ងាយជាង ៣២០ គ.ម ពីរដ្ឋធានី Rio de Janeiro របស់ប្រទេសប្រេស៊ីល។ លោកបានកើតក្នុងទ្រនំគ្រួសារក្រខ្សត់ ដែលមានឪពុកឈ្មោះ Joao Ramos do Nascimento AKA Dodinho ជាអតីតកីឡាករបាល់ទាត់លេងឲ្យជម្រើសជាតិប្រេស៊ីល និងម្ដាយឈ្មោះ Celeste Arantes ជាស្ត្រីមេផ្ទះ។
ស្ថានភាពគ្រួសាររបស់ Pele មិនជាអ្នកធូរធារដូចគ្រួសារឯទៀតនោះទេ ដោយឪពុកត្រឹមជាកីឡាករដែលចូលនិវត្ត ព្រោះនៅសម័យនោះវិស័យបាល់ទាត់មិនមែនជាអាជីពដែលអាចរកចំណូលបានក្រាស់ក្រែលដូចបច្ចុប្បន្ន ទើបជាហេតុបង្ខំឲ្យលោកព្យួរស្បែកជើងយ៉ាងឆាប់រហ័សបំផុត ដើម្បីយកពេលទៅស្វែងរកការងារនៅខាងក្រៅ ខណៈដែលម្ដាយក៏ធ្លាប់ស៊ីឈ្នួលជាអ្នកបម្រើតាមផ្ទះឲ្យគេ ដើម្បីបានថវិកាបន្តិចបន្តួចផ្គត់ផ្គង់ដល់ការសិក្សារបស់ Pele។
កាលនៅពីក្មេងលោកធ្លាប់មានក្តីស្រមៃចង់ក្លាយជាអ្នកបើកយន្តហោះ ប៉ុន្តែបំណងប្រាថ្នានេះបានលិចបាត់ទៅវិញ នៅពេលដែលមានហេតុការណ៍ធ្លាក់យន្តហោះមួយក្បែរផ្ទុះរបស់លោក ដោយបណ្ដាលឲ្យ Pilot និងអ្នកធ្វើដំណើរទាំងអស់បានបាត់បង់ជីវិត។
ចាប់តាំងពីពេលនោះមក Pele បានមានឆន្ទៈខិតខំហ្វឹកហាត់បាល់ជាមួយឪពុក ដោយលោកមិនមែនថវិកាទិញបាល់យកមកលេងដោយផ្ទាល់នោះទេ ពោលត្រឹមមូលស្រោមជើងចូលគ្នាចាត់ទុកថាជាបាល់ ឬពេលខ្លះប្រើប្រាស់ផ្លែស្វាយធ្វើជាបាល់ក៏មាន។
រូបតំណាងស្រង់ពីខ្សែភាពយន្ត Pele
រូបតំណាងស្រង់ពីខ្សែភាពយន្ត Pele
បញ្ជាក់ថាមូលហេតុដែល Pele ខិតខំហ្វឹកហាត់មិនបោះបង់ នោះក៏ដោយសារមើលឃើញពីទេពកោសល្យរបស់ឪពុកខ្លួន ដែលជាកីឡាករបាល់ទាត់ដ៏ល្អបំផុតមួយរូប តែត្រូវបង្ខំចិត្តបោះបង់ព្រោះគ្មានថវិកា។ ឪពុក Pele ធ្លាប់មានកំណត់ត្រារកបាន ៥ គ្រាប់ ដោយការប្រើប្រាស់ក្បាលតែតបញ្ចូលទីក្នុងមួយប្រកួត មិនទាន់មាននរណាអាចធ្វើបានដូច។ Pele ធ្លាប់និយាយថា៖ “មានតែព្រះជាម្ចាស់ទេ អាចពន្យល់ថាឪពុករបស់ខ្ញុំអាចធ្វើបែបនោះបានដោយរបៀបណា”។
ឪពុករបស់ Pele បានទទួលមរណភាពនៅវ័យ ៨៩ ឆ្នាំ កាលពីថ្ងៃទី ១៦ វិច្ឆិកា ឆ្នាំ ១៩៩៦ ក្នុងទីក្រុង Sao Paulo។ ក្រឡេកទៅមើលម្តាយរបស់ Pele បន្តិច គឺអ្នកស្រី Arantes ក៏ជាស្ត្រីដ៏គួរឲ្យគោរពម្នាក់បំផុតផងដែរ ព្រោះបានលុតដំកូនឲ្យរៀនក្លាយជាមនុស្សល្អតាំងពីនៅតូច។ Pele ធ្លាប់និយាយអំពីម្តាយថា៖ “ម្តាយរបស់ខ្ញុំជាស្រ្តីដ៏អស្ចារ្យបំផុត គាត់តែងតែខ្វល់ខ្វាយពីគ្រួសារនិងការសិក្សារបស់ខ្ញុំ ហើយបានបង្រៀនឲ្យខ្ញុំចេះគោរពនិងឲ្យតម្លៃមនុស្ស”។
បង្វែរចូលអាជីពក្នុងកីឡាករបាល់ទាត់ Pele បានចាប់ផ្ដើមលេងឲ្យថ្នាលយុវជន Bauru នៅពេលមានអាយុ ១៣ ឆ្នាំ និងវិវត្តខ្លួនទៅចូលរួមនៅក្លឹប Santos ក្នុងអាយុ ១៥ ឆ្នាំ និងនៅជម្រើសជាតិនារយៈពេល ១ ឆ្នាំបន្ទាប់។ ចន្លោះពេលអាជីពជាង ២០ ឆ្នាំ Pele ចូលរួមការប្រកួតសរុប ១ ៣៦៣ លើក រកបាន ១ ២៨១ គ្រាប់ ដោយនេះរាប់ទាំងគ្រាប់បាល់ក្លឹប+ជម្រើសជាតិ មិនថាប្រកួតមិត្តភាពឬប្រកួតផ្លូវការ។
និយាយពីពានរង្វាន់និងជោគជ័យធំៗ Pele ធ្លាប់ឈ្នះ World Cup ៣ លើក និងឈរឈ្មោះជាកីឡាករប្រេស៊ីលរកបានគ្រាប់បាល់ច្រើនបំផុតចំនួន ៧៧ គ្រាប់ និងពានធំតូចជាមួយក្លឹបក៏ដូចជាបុគ្គលមិនក្រោម ៣០ ពានឡើយ។
Pele ដែលបច្ចុប្បន្នមានវ័យ ៧៩ ឆ្នាំ លោកមានទ្រព្យសម្បត្តិជាង ១០០ លានដុល្លារ ដោយលោកធ្លាប់មានភរិយាចំនួន ៣ លើក ដែលចុងក្រោយបង្អស់គឺអ្នកស្រី Marcia Aoki មានទំនាក់ទំនងជាមួយគ្នាជាង ៤ ឆ្នាំហើយ និងកូនសរុបចំនួន ៧ រូប៕
ប្រភព៖ LifeBlogger