លោក Gattuso អ្នកចាត់ការក្រុម Napoli បានបញ្ជាក់ថាក្រុម Barcelona យប់មិញ មិនបានធ្វើឱ្យក្រុមរបស់លោកពិបាកនោះទេ ត្បិតអីពួកគេសម្រុកច្រើន ប៉ុន្តែគ្មានលទ្ធផលឡើយ។
ក្រុម Napoli ស្មើជាមួយក្រុម Barcelona ១-១ ក្នុងការប្រកួតជើងទី១ពានរង្វាន់ UEFA Champions League វគ្គ១៦ក្រុមចុងក្រោយ។ ក្រុមម្ចាស់ផ្ទះ Napoli រកគ្រាប់បាល់នាំមុខបានមុន ដោយ Mertens នៅនាទី៣០ ដោយការទាត់បាល់កោងយ៉ាងស្អាត។ តែចូលដល់តង់ទី២វិញ Griezmann រកបានគ្រាប់បាល់តាមស្មើវិញ នៅនាទី៥៧។
លោក Gattuso បាននិយាយចំពោះការប្រកួតនេះថា៖ “ក្រុម Barcelona មិនបានធ្វើអ្វីយើងកើតឡើយ។ ១គ្រាប់ដែលពួកគេរកបាន គឺជាកំហុសកីឡាកររបស់យើងបន្តិចប៉ុណ្ណោះ។ ពួកគេបានព្យាយាមវាយសម្រុកខ្លាំង ហើយតាំងពីលោក Setien មកដឹកនាំក្រុម នៅតំបន់ប្រយុទ្ធ ក្រុម Barca តែងតែឡើងប្រយុទ្ធម្ដង ៥ទៅ៦នាក់។ ដូច្នេះហើយ យើងត្រូវតែលេងការពារច្រើន ព្រោះវាគ្មានជម្រើសឡើយ។ តែការប្រយុទ្ធរបស់គេប្រកួតនេះ គ្មានប្រសិទ្ធភាពឡើយ”៕ប្រភព៖ Goal
