• Hazard ៖ ខ្ញុំ​ចង់​រក​គ្រាប់​បាល់ ​និង​ក្លាយ​ជា​វីរបុរស​នៅ​ក្លឹប Chelsea

    Eden Hazard ​រក​បាន​២​គ្រាប់ ជួយ​ក្រុម Chelsea ​យក​ឈ្នះ​លើ​ក្រុម Watford ​ក្នុង​លទ្ធផល ២-១ ​កាល​ពី​យប់មិញ​នេះ។

    ២​គ្រាប់​នេះ​ដែរ គឺ​ធ្វើ​ឱ្យ​ Hazard ​រក​បាន​១០១​គ្រាប់​ហើយ​សម្រាប់​ក្រុម Chelsea ​។ ដោយ​គ្រាប់​បាល់​ទាំង​អស់​នេះ ត្រូវ​បាន​សាមី​ខ្លួន​គិត​ថា​ជា​គ្រាប់​បាល់​ដ៏​ច្រើន​មួយ ​ហើយ​វា​នឹង​កើន​ឡើង​ថែម​ទៀត សម្រាប់​ពេល​ខាង​មុខ​នេះ។ ១០១​គ្រាប់​របស់​គេ ​កើត​ឡើង​ដោយ​ជើង​ស្ដាំ​៧១​គ្រាប់ ជើង​ឆ្វេង​២៥​គ្រាប់ ​ក្បាល​៥​គ្រាប់ ​។ខ្សែ​បម្រើ​ប្រយុទ្ធ​ដែល​មិន​អាច​ខ្វះ​បាន​សម្រាប់​លោក Sarri ​បាន​និយាយ​ថា​ខ្លួន​គេ​ចង់​រក្សា​ទម្រង់​លេង​បែប​នេះ ​រក​គ្រាប់​បាល់​ឱ្យ​បាន​ច្រើន​ថែម​ទៀត។ ក្នុង​ន័យ​ថា​ខ្លួន​ចង់​ក្លាយ​ជា​វីរបុរស​នៅ​ក្លឹប​តោ​ខៀវ ​ដោយ​ដើរ​តាម​គន្លង​របស់​អតីត​កីឡាករ Lampard, Terry ​និង Drogba ដែល​បាន​ធ្វើ​កន្លង​មក។

    បច្ចុប្បន្ន ​កីឡាករ​បែលហ្សិក​ខាង​លើ ​កំពុង​ត្រូវ​បាន​ក្លឹប Real Madrid ​ចង់​បាន ​ហើយ​រូបគេ​ក៏​ធ្លាប់​បង្ហើប​ទៀត​ថា​ចង់​ទៅ​លេង​នៅ​អេស្ប៉ាញ​ផង​ដែរ។ លោក Sarri ​អ្នក​ចាត់ការ​ទូទៅ​របស់​ក្រុម Chelsea ​កំពុង​តែ​ព្យាយាម​ឱ្យ​អស់​សមត្ថភាព​ដើម្បី​រក្សា​កីឡាករ​ល្អ​ម្នាក់​នេះ ឱ្យ​នៅ​ជាមួយ​ក្រុម​នៅ​ពេល​ខាង​មុខ​ទៀត៕ប្រភពDailyMail

     

    ភ្ជាប់ទំនាក់ទំនងជាមួយ CTS SPORT