ជាការពិតកីឡាករកំពូលម្នាក់ ក្នុងអាជីពរបស់ពួកគេរមែងធ្លាប់ហែលកាត់បទពិសោធន៍ល្អអាក្រក់រាប់ភ្លេចជាមួយនឹងមិត្តរួមទ្រនំចាស់ថ្មីច្រើនជំនាន់ ហើយខ្លះក៏ដក់ជាប់ជាការចងចាំល្អ ខ្លះទៅក៏មិនជាការដែលគួរឲ្យចងចាំទាល់តែសោះ។
ងាកមក Paulo Dybala ខ្សែប្រយុទ្ធក្លឹប AS Roma ស្ថិតក្នុងវ័យ ៣០ ឆ្នាំ ទាំងនៅក្លឹបនិងជម្រើសជាតិ គេរាប់បានជាកីឡាករសំណាង ព្រោះបានរួមទីលាននឹងតារាឆ្នើមលំដាប់ World class ពីមួយទៅមួយសម័យ។ ស្ថិតិនៅក្លឹបគេឈរជើង ៤៦៧ ប្រកួត ខណៈនៅការលេងឲ្យក្រុមពពកសអាហ្សង់ទីន ទើបតែបាន ៣៨ ប្រកួត។
សួរនាំដល់កីឡាកររួមទីលានល្អបំផុត តាំងពីបើកក្បាលអាជីពមកទល់សព្វថ្ងៃ ត្រូវបានប្រុសសង្ហា Dybala រៀបរាប់ប្រាប់សារព័ត៌មាន Al Arabi Al Jadeed យ៉ាងដូច្នោះ៖ “នោះគឺ Messi/Ronaldo និង Gonzalo Higuain ដែលជាមិត្តរួមក្រុមដ៏ល្អបំផុតក្នុងពិភពបាល់ទាត់សម្រាប់ការយល់ឃើញរបស់ខ្ញុំ”។
គេបន្តថា៖ “ចំពោះ Ronaldo គាត់ជាជើងឯក គ្រាលេងរួមទីលាននឹងគាត់នៅ Juventus ពេលនោះ ពិតជាអស្ចារ្យខ្លាំង ខ្ញុំបានរៀនសូត្ររឿងជាច្រើនចេញពីគាត់ ដូចឆន្ទៈនៃការលះបង់ ចំណង់នៃការឈ្នះ ដ្បិតបើគ្រប់យ៉ាងខ្ញុំធ្លាប់បានសម្រេចមួយចំនួនហើយក៏ពិតមែន ម្ល៉េះខ្ញុំក៏ពុំមានការភ្ញាក់ផ្អើល ចំពោះអ្វីដែលគាត់កំពុងបង្ហាញទម្រង់លេងល្អនៅដីអារ៉ាប៊ីសាអូឌីត”។
លោកបន្តទៀតថា៖ “ចំណែក Messi ខ្ញុំតែងតែមានក្តីស្រមៃចង់លេងជាមួយគាត់តាំងពីនៅក្មេង ហើយឥឡូវអាចរួមជ័យជម្នះពាន World Cup ជាមួយគាត់ វាពិតជាអ្វីដែលខ្ញុំឥតអាចបំភ្លេច”។ ចុងក្រោយនិយាយដល់ឈ្មោះ Higuain ប្រាកដជាចម្លើយដ៏ភ្ញាក់ផ្អើល ព្រោះមកទល់សព្វថ្ងៃសឹងតែមានគ្នាយើងខ្លះ ភ្លេចឈ្មោះកីឡាករចូលនិវត្តរូបនោះបាត់ទៅហើយ។
តែសារថយក្រោយ Dybala ធ្លាប់បានរួមទីលាននឹង Higuain ច្រើនបំផុតគឺកាលនៅសេះបង្កង់ចន្លោះល្បាក់ឆ្នាំ ២០១៦ ដល់ ២០២០ ខណៈនៅជម្រើសជាតិទទួលឱកាសតិចតួចស្តួចស្តើងខ្លាំងណាស់។ រំឭកដែរថា Higuain នេះដែរ ក៏ធ្លាប់បានសរសើរឥតដាច់ពីមាត់មកកាន់ Dybala ថាទម្រង់របស់គេ ស្រដៀងទៅនឹង Messi យ៉ាងដូច្នោះ ហើយអនាគតទៅមុខអាចមានលក្ខណៈគ្រប់គ្រាន់នឹងក្លាយជាកីឡាករល្អបំផុតមួយ។
បន្តទៅរឿងរ៉ាវពាក់ព័ន្ធចុងក្រោយបន្តិចអតីតយុវជន Palermo ក៏បានសរសើរដល់អ្នកចាត់ការដែលទើបអស់តំណែងសញ្ជាតិព័រទុយហ្គាល់ បែបនេះថា៖ “ការដែលបានរួមការងារនឹង Mourinho វាជារឿងដ៏វិសេសវិសាល ហើយចន្លោះពេលនោះ គាត់ពិតជាបានជួយឲ្យខ្ញុំអភិវឌ្ឍខ្លួនឯងឡើង គាត់ពិតសក្ដិសមជាអ្នកចាត់ការពោរពេញដោយបទពិសោធន៍ អាចដឹកអ្នករីកចម្រើនឡើងក្នុងភាពជាកីឡាករ ខ្ញុំអត់ច្បាស់ទេអនាគតគាត់ទៅមុខបែបណា ដឹងត្រឹមជឿជាក់ថា គាត់នឹងនៅតែបន្តលើចំណុចកំពូល”៕
ប្រភព៖ បរទេស