អតីតកាលចន្លោះឆ្នាំ ២០១៣ ដល់ ២០១៧ យើងមិនអាចប្រកែកបានទេ ថា Neymar Jr មិនមែនជាលំដាប់កីឡាករកំពូល ព្រោះទាំងទេពកោសល្យ ទាំងសមិទ្ធផលបង្ហាញមកលើទីលាន គឺសម្រេចសឹងគ្រប់យ៉ាងអស់ហើយជាមួយក្លឹបអ្នកមានបុណ្យ Barcelona។
តារាឆ្នើមប្រេស៊ីលកាលនោះ ក៏ត្រូវបានគេរាប់ចូលជាលំដាប់ Top 3 ទូទាំងសកលលោក នៅបញ្ជីជាមួយ Cristiano Ronaldo និង Lionel Messi ទៀតផង។ ទោះយ៉ាងណាការយល់ឃើញទាំងអំបាលម៉ាន វាត្រូវបានផ្លាស់ប្តូរ បន្ទាប់ការផ្ទេរចូលរបស់គេក្នុងឆ្នាំ ២០១៧ នៅតម្លៃបំបែកកំណត់ត្រា ២២២ លានអឺរ៉ូ ទៅកាន់ក្លឹបបារាំង Paris Saint-Germain។
ហែលពេលវេលាជាមួយក្លឹបក្នុងទីក្រុងប៉ារីសជាង ៦ ឆ្នាំ ក៏ច្រើនជាងទាំងកាលនៅ Barcelona តែងាកទៅគ្រប់យ៉ាងដែលកីឡាករទទួលបានមកវិញ គឺលុយច្រើនជាងជោគជ័យ។ ជាក់ស្តែង Champions League អត់ធ្លាប់បានឈ្នះសូម្បីម្តង ដូចគ្នានឹង Ballon d’Or ក៏រំលងរាប់ឆ្នាំ គ្មានឈ្មោះសូម្បីនៅចំណាត់ថ្នាក់ Top 3។
កត្តារបួសញាំញី បូកផ្សំការធ្លាក់ទម្រង់ដែរនោះ នាំឲ្យខ្សែប្រយុទ្ធស្លាប ជំនាញលេងបាល់ Freestyle ត្រឹមរកបាន ១១៨ គ្រាប់ និង Assist ៧៧ លើក នៅ ១៧៣ ប្រកួត។ គេស្គាល់តែរសជាតិឈ្នះជើងឯកពានក្នុងស្រុកបារាំង បាំងអស់ហើយពានធំក្នុងដីអឺរ៉ុប មិនថាតែជាមួយក្លឹប និងប្រភេទឯកត្តជននានា។
ដល់ងាកទៅ Luis Suarez ដែលធ្លាប់ជាអតីត Trio តំបន់ប្រយុទ្ធរួមគ្នា MSN នៅ Camp Nou បានសង្កត់ធ្ងន់ថា បើពេលនោះអតីតយុវជន Santos ជ្រើសបន្តនៅ Barcelona ឬមានជម្រើសផ្ទេរទៅក្លឹបយក្សនៅអង់គ្លេស ម្ល៉េះគេនឹងអាចជោគជ័យជាងនៅ PSG ហើយក៏អាចឈ្នះគ្រប់យ៉ាងក្នុងពិភពបាល់ទាត់។
រំឭកសម្តីចាស់របស់កីឡាករអ៊ុយរុយហ្គាយ ធ្លាប់ឲ្យយោបល់ចំៗទៅកាន់កីឡាករប្រេស៊ីល៖ “ប្រសិន Neymar គេបន្តនៅ Barcelona ខ្ញុំច្បាស់ណាស់គេនឹងឈ្នះពាន Ballon d’Or យើងបានទៅជជែកជាមួយ Neymar ដោយផ្ទាល់ដែរ ថាបើចង់ឈ្នះគ្រប់យ៉ាងគេត្រូវតែនៅទីនេះ តែពេលខ្លះយើងយល់អំពីបរិយាកាសដែលពិបាកនឹងគ្រប់គ្រង”។
លោកបន្ត៖ “យើងជាមិត្តភក្តិ យើងចង់ឲ្យគេនៅ តែការសម្រេចចិត្តរបស់គេ គឺសម្រាប់ខ្លួនឯងនិងក្រុមគ្រួសារ មួយវិញទៀតយើងថាដែរ បើចាកចេញទៅ ហេតុអ្វីត្រូវទៅក្លឹបនៅបារាំង ពួកយើងណែនាំឲ្យគេទៅ Manchester City ត្រង់បាល់ទាត់នៅអង់គ្លេសគឺល្អសម្រាប់គេជាង ក៏នឹងអាចឈ្នះអ្វីៗបានដូចគ្នា”។
ជាការពិតបើយើងស្រមៃដូចសម្តីរបស់ Suarez លើកឡើង គឺវាអាចទៅរួច សម្រាប់ Neymar ក្នុងការឈ្នះពានធំតូច រួមទាំងពានឯកត្តជនគ្រប់យ៉ាងនៅ Etihad Stadium។ ជាឧទាហរណ៍ជាក់ស្តែងមើលតែលទ្ធផលសម្រេចរបស់ Julian Alvarez, Erling Haaland និង Phil Foden ជាដើម ពួកគេនៅក្មេងទេ បទពិសោធន៍ស្ទើរជាង Neymar ផង តែស្គាល់រួចហើយរសជាតិឈ្នះជើងឯក Champions League, UEFA Super Cup ថែមទាំង FIFA Club World Cup។ តាមថា ល្បាក់មុនចុងឆ្នាំដែល Neymar ចប់កុងត្រាជាមួយ Nike បើគេឈ្នះពាន Ballon d’Or ខាងក្រុមហ៊ុនជាដៃគូឧបត្ថម្ភ នឹងបន្ថែម Bonus ឲ្យដល់ ១ លានដុល្លារ តែវាបែរមិនអាចកើតឡើង។
ឥឡូវបកមកពេលវេលាបច្ចុប្បន្ន វាហួសឆ្ងាយណាស់ទៅហើយ ក្នុងការត្រលប់សម្រាប់ខ្សែប្រយុទ្ធទើបឈានចូលអាយុ ៣២ ឆ្នាំថ្មីថ្មោង ត្រង់កំពុងតំណាងឈ្មោះនៅ Al-Hilal ហើយសម្រាកព្យាបាលរបួស មិនទាន់ជាសះស្បើយផង។ ចុងក្រោយរំឭកបន្តិច ពាក់ព័ន្ធនឹងកីឡាករប្រេស៊ីលចុងក្រោយកាន់ពាន Ballon d’Or គឺខកខានកើតឡើងតាំងឆ្នាំ ២០០៧ គ្រាជំនាន់ Kaka ឈរជើងនៅ AC Milan។ ចុះពេលទៅមុខនេះ ពួកគេមានធនធានល្អៗដូច Vinicius Jr, Rodrygo, Richarlison និង Antony ជាដើម ចាំមើលតើមានអ្នកអាចទៅរួចទេ?
ប្រភព៖ បរទេស