មុនការប្រកួតរបស់ Man United រយៈពេល ៣ ថ្ងៃ ងាកទៅអតីតកីឡាករ Angel di Maria ដែលធ្លាប់ឈរជើងនៅ Old Trafford បានបង្ហាញចំណាប់អារម្មណ៍ពាក់ព័ន្ធកាយវិការរបស់ Alejandro Garnacho សព្វថ្ងៃ ថាបើជាខ្លួនវិញ មានសញ្ជាតិអាហ្សង់ទីនដូច្នេះ ម្ល៉េះពេលអបអរ មិនទៅអបអរស្ទាយតាម Cristiano Ronaldo ទេ ផ្ទុយទៅវិញ បន្ទាប់បំប៉ោងសំណាញ់ទី គេនឹងរត់ទៅអបអរស្ទាយ Lionel Messi ជំនួស។
ដល់ងាកទៅសាមីខ្លួនដែលត្រូវបានសិស្សច្បងរិះគន់ ហាក់មិនឈឺក្បាលអ្វីទាំងអស់ ផ្ទុយទៅវិញ មានតែថែម គឺមិនថមថយទេ ត្រង់ការយកបាន ២ គ្រាប់នៅប្រកួតយកឈ្នះ ៣-០ ទល់ West Ham យប់មិញ គេក៏ថែមទាំងអបអរស្ទាយថ្មីរបស់ Ronaldo ដែលខ្លួនមិនធ្លាប់បានធ្វើ នោះគឺរត់ទៅអង្គុយពីលើផ្ទាំង LED ផ្សព្វផ្សាយពាណិជ្ជកម្ម ជាស្ទាយល្បីស្តេចបាល់ទាត់ព័រទុយហ្គាល់ធ្លាប់បានធ្វើញឹកញាប់កាលនៅ Real Madrid។ ខ្សែប្រយុទ្ធពាក់អាវលេខ ១៧ បង្ហើបចំៗថា ស្ទាយអបអររបស់គេ គឺពិតជាបានជំរុញនិងបំផុសទឹកចិត្តសម្រាប់គេបន្ថែមទៀត។
ទង្វើនេះបង្ហាញច្បាស់ថា ចិត្តដែលស្រលាញ់គាំទ្ររបស់អ្វីមួយសម្រាប់ Garnacho គឺនៅតែបន្តដដែល ដោយឥតខ្វល់ខ្វាយពីសម្តីរៀមច្បងនៅជម្រើសជាតិឡើយ។ បកទៅមតិអ្នកគាំទ្រលើបណ្តាញសង្គម បានបង្ហាញការបារម្ភទុកជាមុន ថារូបភាពអស់នេះ អាចនឹងប៉ះពាល់ដល់ទំនាក់ទំនងផ្ទៃក្នុងរវាងយុវជនវ័យ ១៩ ឆ្នាំ នៅពេលទៅលេងឲ្យជម្រើសជាតិនាពេលខាងមុខទៀត។
ខ្លះក៏បង្ហាញការព្រួយបារម្ភ ថាគេអាចនឹងបាត់បង់ឱកាសបង្ហាញខ្លួនឲ្យពពកសអាហ្សង់ទីននៅ Copa America 2024 នាល្បាក់ពាក់កណ្តាលឆ្នាំ។ យ៉ាងណាក៏មានមតិខ្លះនៅតែរក្សាជំហរគាំទ្រ ហើយជឿថា ខាងថ្នាក់លើអាហ្សង់ទីននឹងមិនផ្តោតតែមើលរូបភាពបែបហ្នឹងទេ សំខាន់ឲ្យតែ Garnacho គេមានគុណភាពពិតប្រាកដ ទោះគាំទ្រខាងកីឡាករគូប្រជែងកាន់ឆ្នាំរបស់ Messi ក៏ដោយ។
បន្តទៅរឿង Rasmus Hojlund បន្តិច កីឡាករដាណឺម៉ាកដែលមួយរយៈមុនហាក់រងពាក្យរិះគន់ ថាពិបាកនឹងបង្កើតគ្រាប់បាល់បើកឆាកក្នុងក្របខ័ណ្ឌ Premier League ឥឡូវបានស៊ុត គឺជក់ស៊ុត ជាប់គ្នា ៤ ប្រកួតឥតដកជើង ដល់កើតជាកំណត់ត្រាចារទុកទៀតផង។
Hojlund បានក្លាយជាកីឡាករវ័យក្មេងបង្អស់ ក្នុងអាយុ ២១ ឆ្នាំ និង ០ ថ្ងៃ ដែលអាចរកបានគ្រាប់បាល់នៅ ៤ ប្រកួតជាប់ៗគ្នា Premier League តួយ៉ាងតាំងពីពេលប៉ះ Aston Villa, Spurs, Wolves និង West Ham ខណៈកាលប្រកួតទល់ Nottingham មិនមានវត្តមានរបស់គេ ដូច្នេះយើងមិនរាប់ចូលទេ។
ចាប់អារម្មណ៍រឿងស្ទាយអបអររបស់កីឡាករកម្ពស់ ១,៩១ ម៉ែត្រ នៅ Old Trafford យប់មិញបន្តិច ពេលដែលគេរកបានគ្រាប់បាល់ចេញពីជើងខ្លួនឯង Hojlund ក៏រត់មកលោតរបៀបដេញហ្គីតាលើអាកាស។ ដល់តែសួរនាំទៅកីឡាករថា ស្ទាយអបអរនោះ មិនមានអត្ថន័យអ្វីបង្កប់ច្រើនទេ តែជាការទទូចពីមិត្តភក្តិដែលចង់ឲ្យធ្វើតាំងពីផ្ទេរមករដូវក្តៅ ហើយប្រកួតមុនៗចេះតែមិនបានធ្វើ ក៏សម្រេចបង្ហាញផ្ញើជូនពួកគេថ្ងៃហ្នឹងតែម្តងទៅ។
មើលទៅ Hojlund និង Garnacho ហាក់កំពុងត្រូវរ៉ូវចិត្តគ្នាជាខ្លាំង ថាមិនត្រូវពេលទៅមុខអាចនឹងក្លាយជាដៃគូដៃកង់តំបន់ប្រយុទ្ធដ៏មុតស្រួចក៏ថាបាន។ អតីតសមាជិកក្លឹប Copenhagen និយាយទាំងទឹកមុខញញឹមញញែម៖ “ពួកយើងនៅក្មេង ខ្ញុំទើបតែចូល ២១ ហើយ Garnacho គេ ១៩ ឆ្នាំ យើងនឹងបន្តល្អប្រសើរឡើងៗពីមួយថ្ងៃទៅមួយថ្ងៃ ហើយដូចគ្នានឹងទំនាក់ទំនងរវាងយើងនឹងអភិវឌ្ឍឡើង”៕
ប្រភព៖ បរទេស