ស្ថិតនៅទីណា កន្លែងណាទាបខ្ពស់មិនសំខាន់ តែសំខាន់ឆន្ទៈហ៊ានប្តូរអស់ហើយលើទីលាន ជាពិសេសក្នុងនាមជាខ្សែការពារផង Ali Al-Bulayhi ក៏ជាកីឡាករពោរពេញដោយបទពិសោធន៍កាន់ឆ្នាំ មួយរយៈចុងក្រោយត្រូវបានគេមើលឃើញ ដល់ថ្នាក់ហ៊ានដាក់រហស្សនាមជា “Ramos អារ៉ាប៊ីសាអ៊ូឌីត”។
តើខ្សែការពារកណ្តាលវ័យ ៣៤ ឆ្នាំខាងលើ មានចំណុចលេចធ្លោអ្វីខ្លះ និងធ្លាប់បានតតាំងលំដាប់កីឡាករកំពូលណាខ្លះហើយ តស់យើងទៅតាមដានជាមួយ CTS SPORTS៖
រៀបរាប់ត្រួសៗឲ្យស្គាល់ Al-Bulayhi ជាមុនសិន នេះមួយអាជីពតាំងចាប់ផ្តើមប្រលូកឲ្យតែក្លិបនៅដីកំណើត ដើមឡើយជាមួយ Al-Fateh តាំងឈុតថ្នាល លុះពេលចុងក្រោយ ២០១៧ ក៏ផ្ទេរមក Al-Hilal បន្តឈរជើងទល់សព្វថ្ងៃ។ ទោះលេងឲ្យជម្រើសជាតិឈរ FIFA Ranking ទី ៥៥ និងក្លឹបស្ថិតនៅក្រៅដីអឺរ៉ុប តែចរិតលក្ខណៈលើទីលានប្រកួតទល់គីឡូធ្ងន់ស្រាលណាក៏ដោយ មើលទៅកីឡាករមាឌឌាំង ១,៨២ ម៉ែត្រ ហាក់មិនញញើតនរណាទាល់តែសោះឡើយ ឲ្យតែប៉ះគ្នា ចូលមក គឺហ៊ានពើងទ្រូងដាក់តែទាំងអស់ហ្នឹង។ ស្ថិតិសរុបឲ្យក្លឹប ២៤៨ ប្រកួត រកបាន ១៨ គ្រាប់ Assist ១ រីឯនៅជម្រើសជាតិ ៤៤ ប្រកួត ក៏រកបាន ១ គ្រាប់ដែរ។
៤) គ្រាប៉ះ Luis Suarez
ត្រលប់ទៅពេលវេលាថ្មីថ្មោងមកបង្ហាញខ្លួនឲ្យជម្រើសជាតិ នៅពាក់កណ្តាលខែមិថុនា ឆ្នាំ ២០១៨ ល្បាក់ព្រឹត្តិការណ៍ FIFA World Cup ក្នុងប្រទេសរុស្ស៊ី នៅវគ្គចែកពូល អ៊ុយរុយហ្គាយបានតតាំងយកឈ្នះ ១-០ ទៅលើអារ៉ាប៊ីសាអូឌីត។
ទោះយ៉ាងណាវាមិនរាប់ជាការយកឈ្នះធូរៗឡើយ ហើយ Suarez ដែលជាអ្នកបញ្ចប់ទីគ្រាប់បាល់យកជ័យជម្នះ ក៏ប៉ះទង្គិចមិនចេះតិចដែរ ដួលផងអីផង ទល់ម្ចាស់អាវលេខ ៤ ជាជញ្ជាំងក្រោមរបស់ឥន្រ្ទីយ៍ស។ តាមពិតទៅកម្ពស់កំពរបស់អ្នកទាំងពីរប្រហែលគ្នា តែនិយាយពីកម្លាំងហាក់បុកមិនឈ្នះលំដាប់ខ្សែការពារអាស៊ីខាងលើឡើយ។
៣) គ្រាប៉ះ Messi
បន្តទៅ World Cup សម័យកាលបន្ទាប់ ២០២២ ពិតជាគួរឲ្យភ្ញាក់ផ្អើល ដែលអារ៉ាប៊ីសាអូឌីតជាក្រុមតែមួយគត់ បានយកឈ្នះគីឡូជើងឯកអាហ្សង់ទីនកាលវគ្គចែកពូល។ លទ្ធផល ១-២ ក៏គួរតែអរគុណជាពិសេសដល់ចំណែកខ្សែការពារក្រោម Al Bulayhi ដែលប្តូរអស់ហើយ ជាពិសេសការតាមបិទ ម្ចាស់អាវលេខ ១០ របស់ឡាទីន ចាប់ផងឱបផង ក៏មានលាយពាក្យពេចន៍ឌឺដងភ្លាមៗនៅនឹងកន្លែងផងដែរ។
២) គ្រាប៉ះ Ronaldo
ថា Messi និង Suarez ជាកីឡាករគូប្រជែងក្រៅទ្វីប ឥឡូវមកប៉ះ Cristiano Ronaldo ដែលជាសមាជិករួមលីគ Saudi Pro League តែមួយ ក៏ខ្សែការពាររបស់ Al-Hilal មិនបន្ធូរបន្ថយដៃឲ្យដែរ។ ពួកគេជួបគ្នាច្រើនលើកច្រើនសារហើយ តែជាមួយ CR7 ក៏ខាងកីឡាករព័រទុយហ្គាល់អត់ទុកឲ្យដែរ ហើយមានតែកាយវិការផ្លែផ្កាទៅមក ម្តងៗភ័យដែរ ខ្លាចតែប៉ះគ្នាខ្លាំង ដល់កើតជាកាយវិការមិនល្អ។
រូបភាពថ្មី អាចនឹងកើតឡើងពេលដ៏ខ្លីខាងមុខ ចំកាលបរិច្ឆេទវិលមកលីគបន្ទាប់គឺ Al-Nassr កំណត់ត្រូវជួបម្ចាស់ផ្ទះ Al-Hilal នេះគីឡូធ្ងន់លេខ ២ ត្រូវជួបលេខ ១ ហើយ នៅវេលាម៉ោង ០១:០០ នាទីទៀបភ្លឺ ឈានចូលថ្ងៃសុក្រ ទី ០៩ កុម្ភៈ នឹងមានផ្សាយបន្តផ្ទាល់លើទំព័រ CTS SPORTS។
១) គ្រាប៉ះ Son Heung-min
https://youtu.be/L4bwv-BPTKI
មានគ្រប់រសជាតិជួបអស់ហើយ លំដាប់កំពូលឡាទីន អឺរ៉ុប ដល់តែមកអាស៊ីដូចគ្នា ក៏ Al-Bulayhi លេងមិនសំចៃដៃ។ កន្លងមកនៅវគ្គ ១៦ ក្រុម AFC Asian Cup ក៏មានពេលមួយនោះ CB របស់ជម្រើសជាតិដឹកនាំដោយលោក Roberto Mancini បានទៅច្រានមួយទំហឹងដៃលើ តារាឆ្នើមកូរ៉េខាងត្បូង Son Heung-min ទៀតផង រួចក៏មានទាំងទង្វើ នៃការយកដៃទៅទាញសក់សមាជិកក្លឹប Spurs ឡើងទាំងមិនញញើត។
កាយវិការអស់នេះ ខ្លះក៏សរសើរពីឆន្ទៈនាមជាខ្សែការពារ តែខ្លះក៏រិះគន់ថាវាមិនជារូបភាពល្អ ហើយខ្លះទៀតក៏ទទូចសុំឲ្យមានពេលវេលាណាមួយដែលកីឡាករខាងលើ អាចតតាំង Zlatan Ibrahimovic។ ចុះយោបល់របស់អ្នករាល់គ្នា មើលឃើញ Ali Al-Bulayhi ជាខ្សែការពារបែបណា?
ប្រភព៖ បរទេស