អ្នកគាំទ្រសេរ៊ីចាស់របស់ក្លឹប Manchester United និង Real Madrid ជឿថា ប្រាកដជាធ្លាប់បានលឺឈ្មោះ “Chicharito” ឬអ្នកខ្លះថែមទាំងដាក់រហស្សនាមឲ្យបុរសមាឌល្អិតម៉ិកស៊ីកូរូបនេះថាជា “មីឆាសាច់គោ”។ បន្ទាប់ស្ងប់ស្ងាត់ពីទីលានអស់រយៈពេលច្រើនខែ ទីបំផុតគេក៏ត្រលប់មកវិញជាថ្មី តាមរយៈការវិលត្រលប់ទៅកាន់ផ្ទះចាស់ នៅឯទ្រនំកំណើតក្នុងទ្វីបអាមេរិកខាងជើង។
លើកចុងក្រោយបុរសវ័យ ៣៥ ឆ្នាំ បានឈរជើងឲ្យក្លឹបអាមេរិក LA Galaxy ៣ រដូវកាល រហូតដល់ខែមិថុនា ឆ្នាំ ២០២៣ លោកបានជួបរបួស ACL ទាមទារការសម្រាករយៈពេលយូរ ហើយដល់ខែវិច្ឆិកា ក៏សម្រេចក្លាយជា Free Agent ចាកចេញក្នុងលក្ខខណ្ឌឥតតម្លៃខ្លួន។ មកទល់ថ្មីថ្មោង Chicharito បានប្រកាសការត្រលប់មកអតីតក្លឹបចាស់ Chivas នៅឯម៉ិកស៊ីកូ ក្រោយខកខានឈរជើងនៅទីនោះអស់រយៈពេល ១៤ ឆ្នាំ។
តាមកិច្ចព្រមព្រៀងផ្លូវការ ខ្សែប្រយុទ្ធខាងលើបានចុះហត្ថលេខាដល់ចុងខែមិថុនា ឆ្នាំ ២០២៤ ជាមួយក្លឹប ជាមួយការទទួលបានអាវលេខ ១៤ ដែលវាជាអំណោយធំមួយ ត្រង់នេះជាអាវលេខពិសេស គេធ្លាប់បានប្រើប្រាស់ទាំងកាលនៅ Man United, Real Madrid និង LA Galaxy។
យ៉ាងណាបើនិយាយដល់អំណោយធំលើសពីនេះ នោះគឺទំហំចិត្តស្វាគមន៍យ៉ាងកក់ក្តៅមិនគួរឲ្យជឿពីសំណាក់ថ្នាក់ដឹកនាំ មិត្តរួមក្លឹប រួមទាំងសន្ទុះអ្នកគាំទ្រដង្ហែនៅតាមដងវិថី និងក្នុងកីឡដ្ឋាន។ មនុស្សជាង ៤០ ០០០ នាក់ បានស្រែកអបអរដល់វត្តមាន Chicharito ឬមានឈ្មោះ Javier Hernandez កាលពីយប់ថ្ងៃសៅរ៍ ហើយមើលទៅទឹកមុខកីឡាករផ្ទាល់ ពិតជាមានក្តីរំភើបពន់ពេក ដល់ស្រក់ទឹកភ្នែកឥតដឹងខ្លួន។ ខ្សែប្រយុទ្ធជំនាញជើងស្តាំបានរៀបរាប់៖ “នេះខ្ញុំត្រលប់មកផ្ទះវិញ ដោយទទួលបានការស្រលាញ់ពេញចិត្តពីអ្នករាល់គ្នា ខ្ញុំពិតជាគ្មានអ្វីនឹងរៀបរាប់ទៅបានទេ”។
El mensaje de Sir Alex Ferguson a ‘Chicharito’ por su fichaje con Chivas. pic.twitter.com/fYDbunvsiG
— Luis Omar Tapia (@LuisOmarTapia) January 24, 2024
គួរឲ្យដឹងថា បើផ្សារភ្ជាប់ជាមួយបាល់ទាត់ម៉ិកស៊ីកូ គឺតមក ៣ ជំនាន់ហើយ តាំងពីជំនាន់លោកតា មានឈ្មោះ Tomas Balcazar រាប់បានជា Legend របស់ក្លឹប Chivas និងជម្រើសជាតិម៉ិកស៊ីកូ តែបានទទួលមរណភាពកាលឆ្នាំ ២០២០ ក្នុងអាយុ ៨៨ ឆ្នាំ។ រីឯឪពុក មានឈ្មោះ Chicharo ធ្លាប់ជាសមាជិកជួយម៉ិកស៊ីកូនៅ World Cup ១៩៨៦ គ្រាធ្វើជាម្ចាស់ផ្ទះ និងចុងក្រោយតមកជំនាន់កូនប្រុស ក៏ជាចៅ តំណាងឲ្យជម្រើសជាតិឆ្នាំ ២០០៩ ដល់ ២០១៩ រហូតជាប់ឈ្មោះជា Top Scorer ក្នុងប្រវត្តិសាស្រ្តធ្វើបាន ៥២ គ្រាប់ ខណៈនៅក្លឹប Chivas ឬមានឈ្មោះផ្លូវការ Deportivo Guadalajaraគេឈរជើងចន្លោះឆ្នាំ ២០០៦ ដល់ ២០១០ មុនផ្ទេរទៅបិសាចក្រហម ក៏រកបាន ២៩ គ្រាប់ Assist ៩ នៅសរុប ៧៩ ប្រកួត។
ជុំវិញដំណើរមកដល់នេះដែរ ក៏មានអតីតអ្នកចាត់ការ ២ រូប ផ្ញើពាក្យពេចន៍អបអរសម្រាប់ Chicharito ផងដែរ ជាក់ស្តែងដូចអតីតគ្រូនៅ Man United គឺ Sir Alex Ferguson បញ្ជាក់ថា៖ “Chicharito, នេះគឺជាចៅហ្វាយរបស់អ្នក ដំបូងបង្អស់ខ្ញុំចង់អបអរអ្នកសម្រាប់ការត្រលប់មកកាន់ក្លឹបកំណើត ត្រលប់ទៅកាន់ម៊ិកស៊ីកូ កន្លែងដែលខ្ញុំចាប់ផ្ដើមរកឃើញអ្នក និងចុះហត្ថលេខាយកអ្នក ក្នុងនាមជាកីឡាករដ៏អស្ចារ្យសម្រាប់ពួកយើង ចូលរួមរីករាយសម្រាប់ក្រុមគ្រួសាររបស់អ្នកផងដែរ ហើយជូនពរឲ្យមានគ្រាប់បាល់ជាច្រើនកើតឡើងបន្ថែមទៀត”។ ស្រដៀងគ្នានឹងអតីតគ្រូចាស់នៅ Madrid គឺលោក Carlo Ancelotti ក៏រៀបរាប់ផ្ញើពាក្យពេចន៍អបអរមួយចំនួនផងដែរទៅកាន់ Chicharito៕
ប្រភព៖ បរទេស