ទាំង Real Madrid ទាំង Barcelona អាចមានឱកាសកាន់ពាន ៤ នៅរដូវកាលទោល ២០២៣/២៤ តួយ៉ាងគឺ La Liga, Copa del Rey, Supercopa de Espana និង UEFA Champions League។ ក៏ប៉ុន្តែមួយក្នុងចំណោមនោះគឺពាន Spanish Super Cup ឬ Supercopa de Espana នឹងសម្រេចឃើញលទ្ធផលឈ្នះចាញ់ មានមួយរវាងក្រុមទាំងពីរ ក្លាយជាម្ចាស់ជើងឯក នៅទៀបភ្លឺឈានចូលថ្ងៃចន្ទទី ១៥ មករាខាងមុខ ក៏នឹងមានផ្សាយបន្តផ្ទាល់លើទំព័រ CTS SPORTS។
អត្ថបទនេះ ពួកយើងនឹងបង្ហាញប្រវត្តិពានរង្វាន់ ក៏ដូចជាទំហំប្រាក់រង្វាន់ លាយឡំនឹងប្រាក់ឧបត្ថម្ភ Bonus ផ្សេងទៀតកីឡាករនិងអ្នកចាត់ការអាចទទួលបាន៖
៣) អ្វីទៅជាពាន Spanish Super Cup?
បង្កើតឡើងដោយសហព័ន្ធបាល់ទាត់អេស្ប៉ាញហៅកាត់ RFEF នៅឆ្នាំ ១៩៨២ គិតទៅមានអាយុកាល ៤២ ឆ្នាំមកហើយ។ ដើមឡើយជារៀងរាល់ឆ្នាំ គេចាប់យក ២ ក្លឹបលេងពីរប្រកួតក្នុងនិងក្រៅដីយកឈ្នះចាញ់ បន្តបន្ទាប់មកវិវត្តទល់សព្វថ្ងៃឡើងដល់ ៤ ក្លឹប ពោលជាក្លឹបការពារជើងឯកនិងជើងរង នៃក្របខ័ណ្ឌ La Liga (ជាក់ស្តែងដូច Barcelona/Real Madrid) និង Copa del Rey (Atletico Madrid/Osasuna) ប្រចាំរដូវកាលចាស់។
២) ទំហំប្រាក់រង្វាន់
បើសួរថា តើសហព័ន្ធបង្កើតចំណូលតាមរយៈអ្វី ដើម្បីយកមករៀបចំនិងឧបត្ថម្ភដល់ក្លឹបចូលរួម? ចម្លើយ៖ គឺទទួលបានមួយផ្នែកធំចេញពីប្រទេសដែលដេញថ្លៃធ្វើជាម្ចាស់ផ្ទះ និងមួយផ្នែកផ្សេងទៀត ពាក់ព័ន្ធនឹងការលក់សិទ្ធផ្សព្វផ្សាយ។
ដូច Spanish Super Cup 2024 ខាង RFEF ទទួលបានប្រាក់ ៤០ លានអឺរ៉ូ ពីភាគីអារ៉ាប៊ីសាអូឌីតនាមជាម្ចាស់ផ្ទះ ហើយលុយអស់នោះ យកទៅបែងចែកជូនទុកជាមុន ឥតគិតក្លឹបណាឈ្នះចាញ់ ពោលជាប្រាក់សម្រាប់ការបង្ហាញខ្លួន គឺផ្តល់ជូន Madrid/Barca ម្ខាង ៦ លានអឺរ៉ូ ហើយ Atletico បាន ៣ លានអឺរ៉ូ និង Osasuna បាន ៨០០ ០០០ អឺរ៉ូ។ ក៏ប៉ុន្តែតាមការព្រមព្រៀងចុងក្រោយក្លឹបធំទាំង ៣ បានឯកភាពគ្នាបន្ថែមប្រាក់ ២០០ ០០០ ផ្សេងទៀត នាំឲ្យសរុប Osasuna ទទួលបាន ១ លានអឺរ៉ូជាថ្លៃចូលរួម។
បន្ថែមពីនោះ នៅមានប្រាក់រង្វាន់នាមក្លឹបឈ្នះជើងឯក និងជើងឯករងពីរផ្សេងទៀត គឺអ្នកឈ្នះបានប្រាក់ ២ លាន ហើយអ្នកចាញ់បាន ១ លានអឺរ៉ូ ក្នុងវគ្គផ្តាច់ព្រ័ត្រ។
១) ប្រាក់ Bonus ជូនសមាជិកក្រុម
ដូចរៀបរាប់ខាងលើ ក៏មានន័យក្លឹបឡើងដល់វគ្គចុងក្រោយ អាចធានាប្រាក់មួយភាគធំចូលហោប៉ៅ បែបនេះពួកគេក៏មិនរិះថាំក្នុងការចែកជូនប្រាក់ឧបត្ថម្ភពីលើថ្លៃឈ្នួលជូនកីឡាករផងដែរ។ យើងទទួលបានរបាយការណ៍ចុងក្រោយពាក់ព័ន្ធក្លឹប Real Madrid ជុំវិញទំហំ Bonus ដែលពួកគេសន្យាចែកជូនកីឡាករ និងសមាជិកគ្រូជំនួយ គ្រូធំប្រចាំក្លឹបទាំងអស់ គឺម្នាក់ ១៥០ ០០០ អឺរ៉ូ សរុបទៅអធិរាជស ត្រៀមចាយលុយសុទ្ធ ៤ លានអឺរ៉ូ ប្រសិនក្លឹបអាចបំបាក់អ្នកមានបុណ្យនៅពេលខាងមុខ។
ចំពោះតួលេខប្រាក់ឧបត្ថម្ភក្រៅមួយតង់នេះ រាប់ថាច្រើនគួរសម ត្រង់វាស្មើនឹងទំហំប្រាក់ឈ្នួលលំដាប់កីឡាករមួយចំនួនទទួលបានក្នុងមួយអាទិត្យទៅហើយ ជាក់ស្តែងដូច Nacho Fernandez មួយអាទិត្យនៅ Real Madrid បានប្រហែល ១៦០ ០០០ អឺរ៉ូ។ ដោយឡែកបង្វែរទៅខាង Barcelona គឺយើងមិនទាន់ទទួលដំណឹងច្បាស់ការនៅឡើយពាក់ព័ន្ធរឿងរ៉ាវខាងលើ៕
ប្រភព៖ បរទេស