លោក Antonio Conte បានចែកផ្លូវគ្នាជាមួយក្រុម Spurs មែនទែនហើយ ក្រោយពីសេចក្ដីប្រកាសជាផ្លូវការកាលពីយប់មិញនេះ។
លោក Conte បានចូលដឹកនាំក្រុម Spurs ក្នុងរយៈពេល១៦ខែ។ ចុងក្រោយនេះ លោកបានហៅកីឡាកររបស់ក្រុមមួយនេះថាជាមនុស្សគិតតែពីខ្លួនឯង មិនបានគិតប្រយោជន៍រួមសំខាន់នោះទេ ទើបបានជាក្លឹបមិនឈ្នះពានអ្វីសោះរាប់ឆ្នាំមកហើយ។ កត្ដាមើលស្រាល និងរិះគន់ក្លឹបបែបនេះហើយ ទើបបានជាថ្នាក់ដឹកនាំ Spurs សម្រេចចិត្តដកលោកចោលតែម្ដង មុនកិច្ចសន្យាផុតកំណត់នៅត្រឹមចប់រដូវកាលនេះ។
ក្នុងរយៈពេលជាង១ឆ្នាំមកនេះ លោក Conte ដឹកនាំ Spurs បាន៧៦ប្រកួត ក្នុងនោះឈ្នះ៤០ និងចាញ់២៣ប្រកួត។ ភាគរយឈ្នះដែលលោកទទួលបានគឺ ៥៤,១%ទាបជាងគេបំផុត បើធៀបជាមួយក្លឹបដទៃដែលលោកដឹកនាំកន្លងមកដូចជា Juventus , Chelsea ជាដើម៕