ពិធីរត់ភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ត្រូវប្រារព្ធធ្វើឡើងនៅទីក្រុងហាណូយ ប្រទេសវៀតណាម នៅព្រឹកថ្ងៃទី២៤ ខែមីនា ឆ្នាំ២០២៣នេះ ក្រោមការគាំទ្រយ៉ាងពេញទំហឹងពីរដ្ឋាភិបាល និងប្រជាជនវៀតណាម មុនពេលការរត់ភ្លើងគប់កីឡានេះ នឹងត្រូវបន្តដង្ហែនៅប្រទេសផ្សេងៗទៀត ក្នុងតំបន់អាស៊ីអាគ្នេយ៍។
ថ្លែងក្នុងពិធីដង្ហែព្រះអគ្គិជ័យកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នៅប្រទេសវៀតណាម ឯកឧត្តម ហោ សារុន រដ្ឋលេខាធិការក្រសួងទេសចរណ៍ និងជាបេសកជនពិសេសដង្ហែព្រះអគ្គិជ័យកីឡា មានប្រសាសន៍ថា ថ្ងៃនេះមានសេចក្តីសោមនស្សរីករាយ និងមានកិត្តិយសយ៉ាងក្រៃលែង ក្នុងការចូលរួមប្រារព្ធពិធីដង្ហែព្រះអគ្គជ័យកីឡានៅទីនេះ សម្រាប់ការប្រកួតកីឡាអាស៊ីអាគ្នេយ៍ លើកទី៣២ និងកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ នៅកម្ពុជា។ ឯកឧត្តមអរគុណអាជ្ញាធរពាក់ព័ន្ធ រដ្ឋាភិបាលនៃសាធារណរដ្ឋសង្គមនិយមវៀតណាម ដែលបានរៀបចំព្រឹត្តិការណ៍ដ៏មានសារសំខាន់នេះឡើង។
ឯកឧត្តម ហោ សារុន គូសបញ្ជាក់ថា កម្ពុជាមានមោទនភាព ក្នុងការធ្វើជាម្ចាស់ផ្ទះរៀបចំការប្រកួតកីឡាអាស៊ីអាគ្នេយ៍ លើកទី៣២ និងកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលនេះគឺជាការធ្វើម្ចាស់ផ្ទះលើកទី១ សម្រាប់កម្ពុជាចាប់តាំងពីព្រឹត្តិការណ៍កីឡាអាស៊ីអាគ្នេយ៍ បានចាប់ផ្តើមលើកទី១ ក្នុងឆ្នាំ១៩៥៩។ កម្ពុជាបានរៀបចំព្រះរាជពិធីសុំព្រះអគ្គិជ័យកីឡា សម្រាប់ការប្រកួតកីឡាអាស៊ីអាគ្នេយ៍ និងកីឡាអាស៊ានប៉ារ៉ាហ្គេមនេះ នៅប្រាសាទអង្គរវត្ត និងធ្វើការដង្ហែព្រះអគ្គិជ័យកីឡានេះ ទៅកាន់បណ្តាប្រទេសនានា ក្នុងតំបន់អាស៊ានផងដែរ។ ព្រះអគ្គិជ័យកីឡា (Sports Flame) គឺជានិមិត្តរូបនៃថាមពល មិត្តភាព សាមគ្គីភាព និងនិរន្តរភាព ដែលទាំងអស់នេះ ជាតម្លៃសកលនៃទំនាក់ទំនងរវាងការប្រកួតកីឡា និងការរស់នៅប្រចាំថ្ងៃ។
ការដង្ហែភ្លើងគប់កីឡា នៅទីក្រុងហាណូយ ប្រទេសវៀតណាម នៅថ្ងៃនេះ មានការអញ្ជើញចូលរួមពីលោកជំទាវ ជា គឹមថា ឯកអគ្គរាជទូតនៃព្រះរាជាណាចក្រកម្ពុជា ប្រចាំសាធារណរដ្ឋសង្គមនិយមវៀតណាម ឯកឧត្តម ហ័ង ដាវគឿង អនុរដ្ឋមន្ត្រីក្រសួងវប្បធម៌ កីឡា និងទេសចរណ៍ សាធារណរដ្ឋសង្គមនិយមវៀតណាម ឯកឧត្តម ដាំង ហាវៀត អគ្គនាយកនៃអគ្គនាយកដ្ឋានកីឡា នៃក្រសួងវប្បធម៌ កីឡា និងទេសចរណ៍ សាធារណរដ្ឋសង្គមនិយមវៀតណាម និងជាអនុប្រធានគណៈកម្មាធិការអូឡាំពិកវៀតណាម ថ្នាក់ដឹកនាំតំណាងក្រសួងការបរទេសវៀតណាម ថ្នាក់ដឹកនាំតំណាងគណៈកម្មាធិការប្រជាជនទីក្រុងហាណូយ ព្រមទាំងមានការចូលរួមអបអរសាទរពីយុវជន មហាជនជាច្រើនផងដែរ៕
