លោក Antonio Conte បាននិយាយស្ដីបន្ទោសទៅលើកីឡាករ Spurs ខ្លាំងៗ បន្ទាប់ពីនាំមុខគេដល់ទៅ២គ្រាប់ហើយ បែរជារបូតគ្រាប់បាល់ឱ្យគេតាមស្មើវិញបានទៀតនៅចុងម៉ោងក្នុងក្របខណ្ឌ English Premier League ។
ក្នុងការប្រកួតនេះដែរ Spurs បាននាំមុខម្ដងជាពីរដងទៅលើក្រុម Southampton ប៉ុន្តែលទ្ធផលមិនបានធ្វើឱ្យក្រុមទទួលបានជ័យជម្នះនោះទេ។ នៅជិតចប់ការប្រកួតទៅហើយ ក្រុម Spurs ហាក់ដូចជាមិនប្រឹងប្រែងនោះទេ រហូតដល់ក្រុម Southampton តាមស្មើនៅចុងម៉ោងមែនទែនទៅហើយក្នុងលទ្ធផល ៣-៣ ចែកគ្នាត្រឹមម្នាក់មួយពិន្ទុក្នុងការប្រកួតនៅសប្ដាហ៍នេះ។
ក្រោយចប់ការប្រកួត លោក Conte ពិតជាខឹងទៅលើកីឡាកររបស់ខ្លួនមែនទែន។ លោកអះអាងថាសមាជិកម្នាក់ៗហាក់ដូចជាគិតពីប្រយោជន៏ផ្ទាល់ខ្លួនច្រើន រហូតដល់ភ្លេចគិតពីប្រយោជន៍ ដែលធ្វើឱ្យរបូតឱកាសក្នុងការយកជ័យជម្នះនេះ។ សមាជិកក្រុម Spurs ហាក់ដូចជាមិនមានកម្លាំងចិត្ត លេងដោយមិនមានទំនុកចិត្ត ឬចង់ឈ្នះការប្រកួតនោះទេ។ កត្តានេះហើយ ទើបធ្វើឱ្យពួកគេមិនអាចស្វែងរកលទ្ធផលល្អក្នុងការប្រកួតបានឡើយ៕