យប់មិញលើទំព័រ CTS Sports បានមានការផ្សាយបន្តផ្ទាល់ជំនួបពិសេសជាច្រើនគូ ដោយក្លឹបខ្លះក៏ទទួលបានការសាទរ ហើយខ្លះក៏កើតការរអ៊ូពីសំណាក់អ្នកគាំទ្រ បន្ទាប់ការបង្ហាញទម្រង់លេងមិនល្អ ដូចការចង់បាន។ យ៉ាងណាក៏មានរឿងរ៉ាវចៃដន្យ ពាក់ព័ន្ធអ្នកចាំទីកើតឡើងនៅសប្ដាហ៍តែមួយ ដោយ ២ រូបភ្លាត់ភ្លាំងភាំងកើតជាកំហុស រីឯ ១ រូបល្អហួស ជាប់ជាគ្រាប់ពេជ្រកំពុងរះនៅ Premier League៖
៣) កំហុសរបស់ Emiliano Martinez
អ្នកចាំទីជួយអាហ្សង់ទីនឈ្នះជើងឯក World Cup បានធ្វើឲ្យលោក Unai Emery ខកចិត្តជាខ្លាំង បន្ទាប់តែរបូត ៤ គ្រាប់នៅបរាជ័យក្រោមថ្វីជើង Arsenal ដ្បិតបើតង់ទី ១ Aston Villa បាននាំមុខមុន។ តាមថាលទ្ធផលប៊ិះស្មើចែកម្នាក់មួយពិន្ទុ ដល់តែចូលម៉ោងបន្ថែមនាទី ៩០+៣ ក៏ស្រាប់តែ Jorginho យារមួយជើងស៊ុតក្រៅប្រអប់ទៅឡងនឹងបង្គោលទី ហើយមកប៉ះក្បាលផ្នែកខាងក្រោយរបស់ Martinez នាំឲ្យបាល់ផ្លាតចូលទីខ្លួនឯង រាប់ជាគ្រាប់ Own Goal។
ប៉ុណ្ណឹងវាមិនទាន់ចប់នោះទេ ដល់តែចុងម៉ោងខ្វះប៉ុន្មានវិនាទីចប់ការប្រកួត ក៏ Martinez បានឡើងទៅចាំតែតបាល់ជ្រុងជាមួយមិត្តរួមក្រុមឯងទៀត រាប់ជាឱកាសចុងក្រោយរបស់ Aston Villa គិតថាអាចសាងខ្លួនឯងពី Zero ក្លាយទៅជា Hero តែមានឯណា លទ្ធផលបែរផ្ទុយស្រឡះ ហើយបើកឱកាសឲ្យមានបាល់ដាច់មាត់ ដល់ Gabriel Martinelli អាចអូសបាល់ Counter ទៅស៊ុតដោយគ្មានអ្នកចាំទីក្នុងប្រអប់។
បន្ទាប់ចប់ការប្រកួត អ្នកចាត់ការសញ្ជាតិអេស្ប៉ាញ បានរិះគន់ទៅអ្នកចាំទីសញ្ជាតិអាហ្សង់ទីន ថាការដែលឡើងមកចាំតែតបាល់ជ្រុង គឺលោកមិនដែលបង្គាប់ មិនដែលប្រាប់ឲ្យធ្វើបែបហ្នឹងទេ ហើយអត់យល់ថាគេកំពុងគិតអី វាជាការសម្រេចចិត្តដោយឯកឯង។
២) កំហុសរបស់ Nick Pope
បន្ទាប់របូត ២ គ្រាប់នៅនាទីទី ១០ និង ១៧ ដោយថ្វីជើង Darwin Nunez និង Cody Gakpo ក៏ហាក់ធ្វើឲ្យអ្នកចាំទីរបស់ក្លឹប Newcastle បាក់ស្បាត ដល់នាទី ១៧ ពេល Alisson ផ្លោងមួយជើងផុតមាត់ មកកាន់ Mohamed Salah ស្រាប់តែដៃទីមួយ Pope បានរត់ចេញពីប្រអប់ ហើយមិន Clear ចោលដោយប្រើជើង បែរជាទៅពង្រេតខ្លួនយកដៃចាប់ បែបគិតស្មានថាខ្លួនឯងកំពុងស្ថិតក្នុងប្រអប់ទៅវិញ។
កំហុសនេះ បានធ្វើឲ្យអាជ្ញាកណ្តាលហូតកាតក្រហមលើកចេញពីហោប៉ៅដោយមិនគិតយូរនោះទេ។ អវត្តមានរបស់អ្នកចាំទីវ័យ ៣០ ឆ្នាំ នឹងត្រូវផ្តល់ឱកាសឲ្យ Loris Karius ត្រូវទទួលបន្ទុកទាំងស្រុង នៅវគ្គផ្តាច់ព្រ័ត្រ Carabao Cup ទល់ Man Utd នាកំឡុងចុងខែ។
១) គ្រាប់ពេជ្រកំពុងរះ Keylor Navas
ពីដុំថ្មដែល PSG បោះបង់ មកប្រែក្លាយជាដុំពេជ្រដ៏មានតម្លៃ កំពុងរះសារជាថ្មីនៅ Premier League ជាមួយក្លឹបNottingham Forest។ ចាប់តាំងការមកដល់របស់កីឡាករចាស់វស្សាវ័យ ៣៦ ឆ្នាំ គេបានចូលរួមនៅ ៣ ប្រកួតហើយឲ្យក្លឹប ដោយឈ្នះ ១ ស្មើ ១ និងចាញ់ ១។
យ៉ាងណា Navas បានឈ្នះ MOTM នាមកីឡាករល្អបំផុតក្នុងការប្រកួតដល់ទៅ ២ លើក ដូចការប៉ះ Leeds United អាចសង្រ្គោះបាល់ ៤ លើក ហើយយប់មិញប៉ះគីឡូធ្ងន់ Man City ដែលទប់ឲ្យស្មើ ក៏អ្នកចាំទីកូស្តារីកាអាចសង្រ្គោះបាន ៥ លើកផងដែរ។ នេះរាប់ថា កីឡាករហាក់សម្របខ្លួនបានយ៉ាងឆាប់រហ័សជាមួយក្លឹបថ្មី ដ្បិតបើកត្តាវ័យហៀរក្រាស់ក្រែលក្បែរខ្ទង់ ៤០ ក៏ដោយ៕
ប្រភព៖ បរទេស