ខ្សែប្រយុទ្ធ Takefusa Kubo របស់ក្រុមជម្រើសជាតិជប៉ុន បានចាត់ទុកការប្រកួតទល់ក្រុមអេស្ប៉ាញគឺជាការប្រកួតសំខាន់បំផុតក្នុងជីវិតរបស់គេហើយ នាជំនួប FIFA World Cup 2022 នៅរាត្រីនេះ។
ជប៉ុន មានឱកាសឡើងទៅវគ្គ១៦ក្រុមចុងក្រោយបាននៅរាត្រីនេះ លុះត្រាតែអាចយកឈ្នះលើក្រុមអេស្ប៉ាញបាន។ ប្រសិនបើគេអាចបានត្រឹមស្មើ នោះជប៉ុនត្រូវចាំមើលការប្រកួតរវាងក្រុមកូស្ដារីកា និងអាល្លឺម៉ង់ទៀត។ បើសិនជាអាល្លឺម៉ង់ស្មើកូស្ដារីកា នោះក៏ធ្វើឱ្យជប៉ុនមានឱកាសឡើងទៅវគ្គ១៦ក្រុមចុងក្រោយដែរ។ តែអ្វីដែលគ្រូបង្វឹក និងកីឡាករជប៉ុនចង់បានបំផុតនៅរាត្រីនេះ គឺធ្វើយ៉ាងណាយកឈ្នះអេស្ប៉ាញ ឱ្យដូចប្រកួតទី១ដែលពួកគេយកឈ្នះលើអាល្លឺម៉ង់ដែរ។
មុនការប្រកួត ខ្សែប្រយុទ្ធវ័យក្មេង Kubo បានអះអាងថា៖ “យើងត្រៀមខ្លួនរួចហើយ។ នេះជាការប្រកួតសំខាន់បំផុតក្នុងជីវិតរបស់ខ្ញុំ។ ខ្ញុំពិតជាត្រៀមជាស្រេចក្នុងការប្រកួតនេះ ខ្ញុំជឿថាគ្រូបង្វឹកនឹងផ្ដល់នាទីឱ្យខ្ញុំបានចូលលេងក្នុងប្រកួតសំខាន់បែបនេះ ហើយរឹតតែការប្រកួតអស្ចារ្យទៀត បើសិនជាខ្ញុំអាចរកគ្រាប់បាល់បាន”៕