លោក Carlo Ancelotti ថានៅពេលនេះលោកមិនទាន់គិតច្រើនចំពោះរឿងខ្សែប្រយុទ្ធ Kylian Mbappe នោះទេ ព្រោះខ្សែប្រយុទ្ធ Vinicius និង Rodrygo ក៏កំពុងធ្វើបានល្អខ្លាំងណាស់ដែរ។
កាលពីទីផ្សារដោះដូរកីឡាករកន្លងទៅ ក្រុម Real Madrid ព្យាយាមទិញកីឡាករ Mbappe មករួមក្រុមខ្លាំងណាស់ ប៉ុន្តែចុងក្រោយមិនអាចសម្រេចបានដដែល។ កីឡាករបារាំងបានសម្រេចចិត្តបន្ដកុងត្រាថ្មីនៅ PSG ទៀត ដែលធ្វើឱ្យគម្រោងទីផ្សារដោះដូរកីឡាកររបស់ Real Madrid ហាក់មិនជោគជ័យនោះទេ។ តែទោះជាយ៉ាងនេះក្ដី នៅពេលនេះ Real Madrid នៅតែធ្វើបានល្អ និងក្លាយជាក្រុមតែមួយគត់នៅអឺរ៉ុប ដែលលេងមិនទាន់ចាញ់សោះនារដូវកាលថ្មីនេះ។
លោក Ancelotti បាននិយាយដែរថា៖ “Mbappe? យើងកំពុងសប្បាយចិត្តចំពោះតំបន់ប្រយុទ្ធរបស់យើង កីឡាករវ័យក្មេងរបស់យើង។ យើងរីករាយចំពោះអ្វីដែល Vinicius និង Rodrygo កំពុងធ្វើ។ ពួកគេលេងបានល្អ។ យើងមិនបានទៅគិតដល់កីឡាករដទៃទៀតនៅក្រុមផ្សេងនោះទេ”៕