ជំនួបពិសេសប្រចាំសប្តាហ៍នៅក្របខ័ណ្ឌ UEFA Champions League នឹងចូលមកដល់នៅរាត្រីនេះ រវាងក្លឹប Bayern Munich ជាម្ចាស់ផ្ទះ ត្រូវស្វាគមន៍ក្លឹបភ្ញៀវ Barcelona នាវេលាម៉ោង ០២:០០ នាទីយប់ មានផ្សាយផ្ទាល់លើទំព័រ CTS SPORT។ នេះជាប្រកួតវគ្គចែកពូល ជុំទី ២ បន្ទាប់ការយកឈ្នះរបស់ក្រុមទាំងពីរ លើ Inter Milan និង Viktoria Plzen កាលពីជុំមុន។
វាក៏ជាវិលត្រលប់ក្រោយតែជាងមួយខែ នៃការផ្លាស់ចេញរបស់ Robert Lewandowski ពីទឹកដីអាល្លឺម៉ង់ តែមកសារនេះ មិនមែនជាមិត្ត ផ្ទុយទៅវិញក្នុងនាមជាសត្រូវ ហើយដាក់ឆន្ទៈ ១០០ ភាគរយ លេងដើម្បីយក ៣ ពិន្ទុ និងរកបានគ្រាប់បាល់ឲ្យបានច្រើនតាមដែលអាចធ្វើទៅបាន ទល់អតីតក្លឹបចាស់ Bayern Munich។
បើតាមសារព័ត៌មាន El Nacional ចុះផ្សាយថា កីឡាករប៉ូឡូញ ក៏បានណែនាំទៅកាន់អ្នកចាត់ការថ្មី លោក Xavi Hernandez រួចជាស្រេចផងដែរ អំពីចំណុចខ្សោយមួយចំនួនរបស់ក្លឹបដឹកនាំដោយលោក Julian Nagelsmann។ គេជឿថា Xavi គួរតែប្តូរពីការលេងប្រព័ន្ធ ៤-៣-៣ ទៅជាប្រព័ន្ធថ្មីមួយផ្សេងទៀត ដែលដាក់ខ្សែបម្រើ ៤ រូប និងប្រយុទ្ធខាងលើតែ ២ រូបបានហើយ។
យុទ្ធសាស្ត្ររបៀបនេះ គឺ Lewandowskiមានន័យថា ចង់ឲ្យ Xavi ដកប្រយុទ្ធមួយ ហើយញាត់បម្រើចូលមួយបន្ថែម តែក៏តម្រូវឲ្យចាំបាច់ត្រូវតែប្រើប្រាស់ Frenkie de Jong នៅជម្រើស ១១ នាក់ដំបូង។ គេជឿលើផែនការណ៍នេះ នឹងធ្វើឲ្យ Barcelona អាចមានសាច់បាល់លេងច្រើន ហើយក៏នឹងត្រូវបង្ខំឲ្យ Bayern ត្រូវតាមដេញ Press និងតាមប្រដេញយកបាល់សកម្មខុសពីពេលមុនៗ។ ខ្សែប្រយុទ្ធវ័យ ៣៤ ឆ្នាំ ហាក់សិក្សាដឹងពីចន្លោះរបស់ Bayern គឺត្រង់ថា បើខាង Barca អាចគ្រប់គ្រង Possession បានច្រើន នោះប្រាកដនឹងមានភាគរយឈ្នះខ្ពស់ ព្រោះ Bayern រមែងរៀបប្រព័ន្ធ ដែលមិនផ្តោតលើការដេញតាមយកបាល់ជាធំនោះឡើយ។
ប្រសិនណា Xavi ស្តាប់តាមយោបល់ណែនាំពីកូនក្រុម នោះ Raphinha ប្រហែលជាត្រូវដកចេញពីឈុតដំបូង ហើយ Frenkie de Jong លេងកន្លែងរបស់គេក្នុងនាមជាខ្សែបម្រើ រួចបម្រើ ៣ រូបផ្សេងទៀត អាចត្រូវការវត្តមាន Gavi និង Pedri មកជាជំនួយ បូកផ្សំនឹង Sergio Busquets ដែលមានស្រាប់។
ដោយឡែកងាកទៅស្ថានការណ៍ខាង Bayern Munich ឯណោះ ក៏កំពុងមិនស្រួលផងដែរ ដ្បិតអីស្មើ ៣ ប្រកួតជាប់ៗគ្នាក្នុងលីគ ជាហេតុនាំឲ្យកីឡាករក្នុងក្រុម ហាក់មានការងឿងឆ្ងល់ អំពីរបៀបដឹកនាំរបស់គ្រូវ័យក្មេង Nagelsmann។
តាមរបាយការណ៍ពី Daily Mail ចុះផ្សាយថា កីឡាករឈុតធំរបស់ Bayern បានដាក់សំណួរទៅអ្នកចាត់ការវ័យ ៣៥ ឆ្នាំ ឲ្យគួរឈ្វេងយល់ពីកំហុសនៅប្រកួតកន្លងមក ហើយគួរតែកែតម្រូវជាបន្ទាន់ មុនការប៉ះ Barcelona។
ដូច្នេះជឿថា នៅយប់នេះ នឹងមានរឿងល្អមើលជាមិនខាន ហើយក៏នឹងមានការផ្លាស់ប្តូរគួរឲ្យចាប់អារម្មណ៍កើតឡើងនៃក្រុមទាំងសងខាង។ លទ្ធផលបែបណា យើងរង់ចាំតាមដានទាំងអស់គ្នាលើទំព័រ CTS SPORT ជាមួយការអធិប្បាយពី Admin ហ៊ុយ រ៉ាវុទ្ធ!!!