លោក Antonio Conte បាននិយាយព្រមានទៅខ្សែប្រយុទ្ធ Son Heung-min ថាប្រសិនបើគេបន្ដទម្រង់លេងមិនល្អទៀត នោះអាចនឹងរបូតកៅអីជម្រើស១១នាក់ដំបូងនៅ Spurs ហើយ។
Son ដែលជាម្ចាស់ស្បែកជើងមាសនៅ Premier League រដូវកាលមុននោះ ឃើញថាបើកឆាកដើមរដូវកាលនេះមិនទាន់អាចរកគ្រាប់បាល់បាននោះទេ។ រូបគេបានទទួលទំនុកចិត្តពីលោក Conte ណាស់ ដោយជាប់ជម្រើស១១នាក់ដំបូង តែក្រោយៗមកនេះ ដោយសារលេងមិនបានល្អ ទើបត្រូវប្ដូរចេញរហូត និងជំនួសវិញដោយ Dejan Kulusevski ឬ Richarlison ជាដើម។ ការបង្ហាញទម្រង់លេងធ្លាក់ចុះនេះដែរ អាចនឹងធ្វើឱ្យខ្សែប្រយុទ្ធកូរ៉េខាងត្បូងអាចនឹងបាត់ឱកាសលេងច្រើនហើយ ជាពិសេសជម្រើសដំបូងក្នុងក្រុមតែម្ដង។
ក្នុងនោះដែរ លោក Conte បាននិយាយថា៖ “ខ្ញុំគិតថាបើយើងចង់កសាងអ្វីថ្មី អ្វីដែលសំខាន់និងមានមហិច្ឆតាក្នុងការប្រកួតដើម្បីឈ្នះ នោះអ្នកនឹងត្រូវមានការផ្លាស់ប្ដូរហើយ ជាពិសេសនៅតំបន់ប្រយុទ្ធខាងលើ។ យើងមានកីឡាករ៤នាក់ សម្រាប់ខ្ញុំ ពិតជាពិបាកក្នុងការជ្រើសរើសនរណាលេង និងនរណាមិនលេងក្នុងចំណោម៤នាក់នេះ។ ខ្ញុំត្រូវធ្វើការសម្រេចចិត្តឱ្យបានល្អបំផុតដើម្បីក្រុមឈ្នះ។ ប្រសិនបើនរណាមិនអាចបង្ហាញទម្រង់លេងល្អបានទេ នោះយើងនឹងត្រូវមានការផ្លាស់ប្ដូរហើយ យើងមានជម្រើសនិងត្រូវធ្វើឱ្យបានល្អបំផុត”៕