លោក Xavi មានទំនុកចិត្ដថានៅពេលនេះ FC Barcelona បានពង្រឹងសមត្ថភាពល្អជាងមុន ហើយអាចយកឈ្នះក្រុម Bayern Munich បានក្នុងការប្រកួតបានរង្វាន់ UEFA Champions League នៅយប់នេះ។
៤ដងកន្លងមក Barcelona លេងមិនដែលឈ្នះ Bayern Munich ទេ។ ដោយរដូវកាលមុនក្នុងពូលជាមួយគ្នាដែរ ទាំងពីរជើង គឺក្រុម Bayern យកឈ្នះក្នុងលទ្ធផល ៣-០ ទាំងពីរដង។ ខណៈដែលនៅឆ្នាំ២០២០កន្លងទៅវិញ យកឈ្នះលើក្រុមអ្នកមានបុណ្យក្នុងលទ្ធផល ៨-២ ទៀតក្នុងពានរង្វាន់ Champions League នេះដែរ។ ដោយសារតែកំណត់ត្រាចាញ់ច្រើនបែបនេះហើយ ទើបឱ្យតែក្រុមទាំងពីរជួបគ្នា គេតែងតែលើកពីការប្រកួតដែលចាញ់ ៨-២ មកនិយាយជានិច្ច។
យ៉ាងណាមិញនៅលើកនេះវិញ លោក Xavi មានទំនុកចិត្តខ្ពស់។ អ្នកចាត់ការវ័យក្មេងរបស់ Barcelona បាននិយាយថា៖ “ខ្ញុំគិតថាមានការរំពឹងច្រើនលើក្រុមយើង។ ការប្រកួតនេះ គ្មានអ្វីដែលផ្លាស់ប្ដូរទេ ហើយយើងសន្និដ្ឋានអ្វីបានដែរ។ ៩ខែកន្លងផុតហើយ គ្រប់យ៉ាងបានផ្លាស់ប្ដូរ យើងបានពង្រឹងក្រុមឡើងវិញ។ យើងពេញចិត្តសម្រាប់សមាជិកនៅពេលនេះ យើងអាចឈ្នះការប្រកួតនេះ និងផ្លាស់ប្ដូរប្រវត្តិសាស្ត្របាន។ យើងនឹងលេងទល់ក្រុមល្អបំផុតមួយនៅលើលោក ហើយយើងចង់បានបង្ហាញពីកម្រិតរបស់យើង”៕