ហុតទឹកសម្លឹងកាក!!! មិនត្រឹមតែក្រេបជញ្ជក់បទពិសោធន៍ ចំណេះដឹងនានាពីគ្រូបង្វឹករបស់ខ្លួននោះទេ តែកីឡាករ ៣ រូប ដែល CTS SPORT កំពុងបង្ហាញ ថែមទាំងឆ្លៀតបង្កាត់ភ្លើងស្នេហ៍ ហែក្បួនរៀបអន្ទាក់ថ្ពក់យកបេះដូងកូនស្រីគ្រូរបស់ពួកគេ ដល់បានសម្រេចទៀតផង៖
៣) Sergio Aguero
Sergio Leonel Aguero del Castillo អតីតកាលធ្លាប់ជាកីឡាករអាជីព ឈរជើងឲ្យក្លឹប Man City/Barcelona និងជម្រើសជាតិអាហ្សង់ទីន។ វិលត្រលប់ទៅព្រឹត្តិការណ៍ FIFA World Cup ឆ្នាំ២០១០ ក្នុងប្រទេសអាហ្រ្វិកខាងត្បូង ពេលនោះក៏មានវត្តមានគេផងដែរ ក្រោមការដឹកនាំដោយអ្នកចាត់ការលោក Diego Maradona។
បើទោះបីបរាជ័យលើទីលាន ក្រោមថ្វីជើងអាល្លឺម៉ង់ ០-៤ នៅវគ្គ ៨ ក្រុមចុងក្រោយ តែងាកទៅជីវិតក្រៅទីលាន Aguero បែរជោគជ័យយ៉ាងឆាប់រហ័ស ជាមួយកូនស្រីអ្នកចាត់ការខ្លួន។ ចាប់ផ្តើមចែចូវដល់បានរៀបការក្នុងឆ្នាំ ២០០៨ ជាមួយកូនស្រីទីពីររបស់វីរបុរសអាហ្សង់ទីន មានឈ្មោះ Gianinna Maradona។ រំលងមួយឆ្នាំបន្ទាប់ អ្នកទាំងពីរបង្កើតបានកូនប្រុសមួយ នៅប្រទេសអេស្ប៉ាញ គឺ Benjamin តែសោកស្តាយចំណងស្នេហ៍មួយនេះ ឆ្លងរួមគ្នា បានត្រឹមមួយរយៈពេលខ្លី ពោលដល់ឆ្នាំ ២០១២ ក៏ឈានដល់ការលែងលះ។
២) Sunil Chhetri
ជឿថាមានគ្នាយើងតិចណាស់ ដែលបានដឹងអំពីរឿងរ៉ាវកីឡាករកំពូលរបស់ក្រុមជម្រើសជាតិឥណ្ឌា រៀបការជាមួយនឹងកូនស្រីអ្នកចាត់ការខ្លួនឯង។ Chhetri ដែលជាប្រធានក្រុមទាំងនៅក្លឹបនិងជម្រើសជាតិ ក៏មានកេរ្តិ៍ឈ្មោះល្បីល្បាញផងដែរ ដូចបច្ចុប្បន្ននេះ កំពុងរក្សាកំណត់ត្រាជាកីឡាករនៅឈរជើង រកបានគ្រាប់បាល់ច្រើនបំផុតឲ្យជម្រើសជាតិ លំដាប់ទី ៣ បន្ទាប់ពី Cristiano Ronaldo និង Lionel Messi។
បកទៅខែធ្នូ ឆ្នាំ ២០១៧ ខ្សែប្រយុទ្ធជំនាញជើងស្តាំ ក៏ប្រកាសចូលរោងជ័យ ជាមួយគូស្នេហ៍ Sonam Bhattacharya ទាក់ទងគ្នាអស់ពេល ១៣ ឆ្នាំមកហើយ។ នាងជាកូនស្រីបង្កើតរបស់អ្នកចាត់ការលោក Subatra Bhattacharya ធ្លាប់ដឹកនាំក្លឹប Mohun Began ក៏ដូចជាបានបង្វឹក Chhetri ជាកូនប្រសាបច្ចុប្បន្ននេះផងដែរ។
១) Donny van de Beek
ប្រែឈ្មោះពីគ្រូ ប្តូរមកក្លាយជាប៉ាក្មេក ដោយ van de Beek បានហ្វឹកហាត់ក្រោមការដឹកនាំរបស់ជំនួយការគ្រូបង្វឹកលោក Dennis Bergkamp នៅឯក្លឹប Ajax អស់រយៈពេលជាច្រើនឆ្នាំ។ លុះដល់តែបានជួប Estelle Deborah Bergkamp ជាកូនស្រីបង្កើតរបស់គ្រូ ក៏នាំឲ្យកីឡាករហូឡង់ បែកគំនិត ចង់ភ្ជាប់និស្ស័យជាមួយ Dennis លើសពីឈ្មោះជាគ្រូនិងសិស្ស។
Van de Beek បញ្ឆេះស្នេហ៍ជាមួយ Deborah ជានារីមានអាយុបងខ្លួនមួយឆ្នាំ បានជោគជ័យត្រឹមមួយរំពេចកាលពីល្បាក់ឆ្នាំ ២០១៩ ហើយឥឡូវនាងក៏ផ្លាស់មករស់នៅក្នុងទីក្រុង Manchester ជាមួយនឹងមិត្តប្រុស រួមទាំងកូនដំបូងទើបកើត នៅខែមេសា ឆ្នាំ ២០២២ ជាចំណងដៃមួយទៀតផង៕
ប្រភព៖ បរទេស