ក្លឹបបារាំង Paris Saint-Germain ត្រូវបានគេរាយការណ៍ថា កំពុងចាប់អារម្មណ៍ចង់នាំយក Antoinez Griezmann របស់ក្លឹប Barcelona សម្រាប់ទីផ្សារដោះដូររដូវក្តៅ ឆ្នាំ ២០២៣ លើគោលដៅយកមកជំនួសកន្លែង Lionel Messi ជាខ្សែប្រយុទ្ធកំណត់ត្រូវផុតកុងត្រានាចុងរដូវកាល។
Griezmann ពេលនេះ នៅឈរជើងឲ្យក្លឹប Atletico Madrid ក្នុងលក្ខខណ្ឌខ្ចីជើង តែបង្ហាញទម្រង់លេងល្អគួរសម ទោះត្រូវត្បិតត្បៀតពេលវេលាបង្ហាញខ្លួនលើទីលាន។ ជាការពិតតាមកិច្ចព្រមព្រៀង បើ AT ហ៊ានតែប្រើកីឡាករបារាំង លើស ៤៥ នាទីក្នុងប្រកួតទោល នោះនឹងត្រូវទូទាត់ទិញផ្តាច់កុងត្រាតម្លៃ ៤០ លានអឺរ៉ូជាកំហិត។
យ៉ាងណាគេជឿថា លោក Diego Simeone នឹងមិនចាប់អារម្មណ៍ចង់បាន Griezmann ពេញថ្លៃទេ ក៏ជាហេតុបើកផ្លូវឲ្យ PSG ងាកទៅមានកូនចិត្ត និងបានត្រៀមខ្លួនរួចរាល់ ជាមួយតម្លៃប្រហាក់ប្រហែលនោះ គឺ ៣៥ ទៅ ៤០ លានអឺរ៉ូ នាំយកគេមកសហការជាមួយ Kylian Mbappe នៅតំបន់ប្រយុទ្ធខាងលើ។
សម្រាប់ Messi ឯណោះ បើតាមភាគរយ គេអាចនឹងវិលទៅទ្រនំចាស់ Barcelona ក៏ថាបាន បន្ទាប់ការផុតកុងត្រានៅក្លឹបក្នុងទីក្រុងប៉ារីស។ នេះបើតាមសារព័ត៌មាន Futbol Total បានចុះផ្សាយ៕
ប្រភព៖ Futbol Total