អ្នកចាត់ការក្រុមជម្រើសជាតិប្រេស៊ីល លោក Tite បានធ្វើការបញ្ជាក់ច្បាស់ ថា Neymar នឹងមិនដាក់ឲ្យលេងតំណែងស្លាបប្រយុទ្ធខាងឆ្វេងដូចកាលពីមុនទេ ពោលនៅព្រឹត្តិការណ៍ FIFA World Cup 2022 នឹងកំណត់ទៅតំណែងផ្សេង អាចជាប្រយុទ្ធកណ្តាល ឬ Playmaker លេងនៅកណ្ដាលច្រើនជាង។
ជាការពិត Neymar បានជាប់នៅ Role ហ្សីនរបស់គេ ទាំងនៅ Santos, Barcelona និងសូម្បី PSG ជាមួយអាវលេខ ១០ នៅស្លាបខាងឆ្វេង តែ Tite យល់ឃើញផ្សេង ថាអតីតកាលគួរតែត្រូវបានកែតម្រូវ ព្រោះ Neymar ជំនាន់ថ្មីនេះ គេមានបច្ចេកទេសនៃការលេងផ្សេងពីមុន។
ប្រាប់លើប៉ុស្តិ៍ទូរទស្សន៍ប្រេស៊ីល លោក Tite ថា៖ “Neymar ពេលគេស្ថិតនៅកម្រិតដ៏ខ្ពស់ទាំងកាយសម្បទា និងបច្ចេកទេស គេមុតស្រួចណាស់ គេរហ័សជាងមុន ហើយក៏អាចគេចផុតពីការប៉ះទង្គិចនានាផងដែរ ដូច្នេះតំណែងថ្មីរបស់គេ គឺដកចេញពីខាងឆ្វេង មកតំបន់ខាងក្នុងវិញ”។
លោកសង្កត់ធ្ងន់៖ “របៀបនេះ អាចឲ្យគេមានចន្លោះ ចង្វាក់បម្លាស់ទីក៏អាចល្អជាងមុន ហើយការបង្កើតឱកាសក៏ដូចគ្នា ជារួមទៅការលេងស្លាបគឺលែងមានទៀតហើយសម្រាប់ Neymar នោះវាជាសម័យកាល ២០១៤ និង ២០១៨ ខណៈ Neymar សម័យកាលបច្ចុប្បន្នគឺផ្សេងគ្នា”៕
ប្រភព៖ Sportskeeda