Emmanuel Petit ជា​អតីត​កីឡាករ​នៅ Premier League មួយ​រូប បាន​បង្ហាញ​ការ​យល់​ឃើញ​អំពី​ស្ថានភាព​ក្លឹប​កាំភ្លើង​ធំ Arsenal ថា​បន្ត​មាន​ភាគរយ​ខ្ពស់​ក្នុង​ការ​លើក​ពាន​រង្វាន់ តែ​ឱកាស​នេះ ក៏​ផ្សារភ្ជាប់​ទៅ​នឹង​ការ​នាំ​យក​កីឡាករ​នៅ​ទីផ្សារ​ដោះដូរ​ខែ​មករា​ផង​ដែរ។

មើល​ឃើញ​ចន្លោះ​ប្រហោង​ដែល​ថា ការ​យក Arthur Melo ពុំ​មែន​ជា​ដំណោះស្រាយ​ដ៏​សមគួរ​ទេ ផ្ទុយ​ទៅ​វិញ គួរ​តែ​យក​កីឡាករ​រួម​លីគ PL នៅ​ឯ​ក្លឹប​ Brighton។ លោក Petit និយាយ៖ “ខ្ញុំ​ដឹង​ពួក​គេ​ក៏​កំពុង​សន្លឹង​ចង់​បាន ការ​ដឹក​បាល់​ដ៏​ល្អ​មួយ រវាង​តំបន់​បម្រើ​ទៅ​ប្រយុទ្ធ ហើយ​បើ​ខ្ញុំ​ជា Edu [នាយក​ផ្នែក​កីឡា] ម្ល៉េះ​នឹង​ដាក់​សំណើ​ចរចា​ Alexis Mac Allister ពី Brighton មិន​ខាន ខ្ញុំ​ពេញ​ចិត្ត​គេ​ខ្លាំង​ណាស់”។

លោក​បន្ត៖ “ពេល​នេះ Arsenal កំពុង​​ឈរ​លេខ ១ នៅ​តារាង គឺ​ពួក​គេ​ជា​បេក្ខភាព​ដ៏​ធំ​មួយ ហើយ​បាន​ពង្រឹង​ច្រើន​ធៀប​នឹង​រដូវ​កាល​មុនៗ តែ​ក៏​ត្រូវ​ការ ការ​លេង​ឲ្យ​ល្អ​ជាង​នេះ​ផង​ដែរ ទល់​នឹង​ក្លឹប​ធំៗ យ៉ាង​ណា​ទាំង​អត្តចរិត ឆន្ទៈ​កីឡាករ​នៃ​ក្លឹប​ទាំង​មូល គឺ​យើង​មិន​ធ្លាប់​បាន​ឃើញ​ពី​មុន​មក ដូច្នេះ​ហើយ​បើ​អាច​ផ្តួល​ក្លឹប​ធំ​បាន​ទៀត នោះ​ម្ចាស់​ពាន​ប្រាកដ​ជា Arsenal មិន​ខាន”។

រំឭក​ឲ្យ​ដឹង កាល​ពី​យប់​មិញ​ក្លឹប​ដឹកនាំ​ដោយ​លោក Mikel Arteta ក៏​ទើប​តែ​យក​ឈ្នះ ២-១ ទោ​លើ FC Zurich នៅ​វគ្គ​សន្សំ​ពិន្ទុ​ក្នុង​ពូល Europa League។ ប្រកួត​បន្ទាប់​របស់​ពួក​គេ កំណត់​ត្រូវ​ប៉ះ Everton នៅ​យប់​ថ្ងៃ​អាទិត្យ ម៉ោង ០៨:០០ នាទី មាន​ផ្សាយ​ផ្ទាល់​លើ​ទំព័រ CTS SPORT៕

ប្រភព៖ Metro