ភ្នាក់ងាររត់ការលោក Rob Segal បានជំរុញឲ្យលោក Jurgen Klopp គួរទម្លាក់ Trent Alexander-Arnold ចេញពីជម្រើស ១១ នាក់ដំបូង ដើម្បីស្តារស្ថានការណ៍ក្លឹបត្រលប់មកវិញ។ ជាការពិត ហង្សបានបរាជ័យស្ពឹកមុខ ១-៤ ក្រោមថ្វីជើង Napoli ហើយក្នុងក្របខ័ណ្ឌកំពូលអង់គ្លេសក៏ធ្វើមិនបានល្អ ឈរនៅលេខ ៧ ឯណោះ។
Segal លើកឡើង៖ “Liverpool មានបញ្ហាចម្បង ត្រង់កីឡាកររបួសគរជើង ហើយសំខាន់កីឡាករក្នុងក្រុមដូចជា Trent Alexander-Arnold នេះសោត គេគួរទទួលបានពេលវេលាសម្រាកឲ្យយូរបន្តិចហើយ ក៏ដោយសារតែគេមានចរិតក្រអឺតក្រទមគេអាងខ្លួនឯង ទោះធ្វើមិនបានល្អ ក៏នៅបន្តទទួលបានឱកាសដែរ ដូច្នេះមិនថាខុសត្រូវ គេជឿសប្តាហ៍បន្ទាប់នឹងគង់តែបានលេង”។
លោកបន្ត៖ “របៀបដែលគេលេងគឺប្រយុទ្ធខ្លាំងជាងការពារពេលនេះ សឹងតែពេលខ្លះ គេអត់ព្រមរត់ត្រលប់មកក្រោយវិញ ត្រង់ហ្នឹងហើយជាចំណុចខ្សោយ គឺការដែលមិនបត់បែនរហ័សទៅតាមស្ថានភាព នាំឲ្យក្រុមរបស់លោក Klopp ធ្លាក់ទម្រង់លេងខុសពីពេលមុន”។
រំឭកឲ្យដឹង កីឡាករវ័យ ២៣ ឆ្នាំនៅរដូវកាលថ្មី បង្ហាញខ្លួនឲ្យ Liverpool ៨ ប្រកួត រកបាន ២ គ្រាប់ ឈរជើងលើទីលាន ៦៤៧ នាទី។ ប្រកួតបន្ទាប់ Liverpool ត្រូវណាត់ជួប Wolves នៅទឹកដីខ្លួនឯង នាវេលាម៉ោង ០៩:០០ នាទីយប់ថ្ងៃសៅរ៍ មានផ្សាយផ្ទាល់លើទំព័រ CTS SPORT៕
ប្រភព៖ Sportskeeda
