ដូចប្រិយមិត្តបានដឹងហើយ ហេតុផលដែល Pierre-Emerick Aubameyang ជ្រើសការផ្ទេរចេញពី Barcelona មកចុះចូលនៅ Chelsea ក៏ជឿថា ដោយសារពាក់ព័ន្ធនឹងវត្តមានលោក Thomas Tuchel ធ្លាប់ជាអតីតគ្រូចាស់កាលនៅ Dortmund ផងដែរ។ ជាការពិតពួកគេទាំងពីរធ្លាប់រួមក្លឹបតែមួយ តាំងពីនៅទឹកដីអាល្លឺម៉ង់ ហើយក៏ទទួលបានជោគជ័យគួរសម។
លុះមកដល់ Chelsea ភ្លាម កីឡាករហ្គាបុងលើកឡើងភ្លែត ថា រីករាយនឹងបានសហការជាមួយគ្រូសញ្ជាតិអាល្លឺម៉ង់ជាថ្មី លុះរំលងតែមួយប្រកួតដំបូង ក៏ស្រាប់ក្លឹបប្រកាសដកតំណែងលោក Tuchel ភ្លែត។ ការចាកចេញនេះ ធ្វើឲ្យមានការបារម្ភខ្លាចក្រែងខ្សែប្រយុទ្ធប្រអប់មិនទទួលបានឱកាស ក្រោមការដឹកនាំរបស់អ្នកចាត់ការថ្មី។
បើតាមសារព័ត៌មាន The Telegraph បានចុះផ្សាយ ម្ចាស់ក្លឹប Chelsea បានបញ្ជាក់ច្បាស់មកកាន់កីឡាករ Aubameyang ថាធានាអំពីពេលវេលារបស់គេលើទីលានដដែល ដ្បិតលោក Graham Potter មកដឹកនាំជំនួសវត្តមានអតីតគ្រូសំណព្វរបស់គេក៏ពិតមែន។
ទៅមើលទម្លាប់ដឹកនាំរបស់គ្រូសញ្ជាតិអង់គ្លេសបន្តិច ជាមួយ Brighton រមែងលេងប្រព័ន្ធ ៣-៥-២ ដូច្នេះបើបន្តយុទ្ធសាស្រ្តនេះ ជាមួយក្លឹបម្ចាស់ដី Stamford Bridge នោះប្រហែលមានភាគរយនឹងដាក់ Aubameyang ឲ្យលេងខាងលើ ជាមួយ Raheem Sterling ក៏ថាបាន៕
ប្រភព៖ The Telegraph