ក្រុមឥណ្ឌូណេស៊ី កំពុងព្យាយាមដាក់បញ្ចូលកីឡាករហុល្លង់៧នាក់ចូលក្នុងជម្រើសជាតិរបស់ខ្លួន ដើម្បីត្រៀមលេងពានរង្វាន់ U20 FIFA World Cup ដែលពួកគេធ្វើជាម្ចាស់ផ្ទះ។
U20 World Cup 2023 នឹងធ្វើឡើងនៅប្រទេសឥណ្ឌូណេស៊ី។ ក្នុងនាមជាម្ចាស់ផ្ទះ U20 របស់ប្រទេសនេះនឹងទទួលបានកៅអីមួយផងដែរដើម្បីចូលលេងពានរង្វាន់កម្រិតអន្ដរជាតិនេះ។ ដើម្បីត្រៀមខ្លួនឱ្យបានល្អនិងអាចប្រកួតប្រជែងជាមួយបណ្ដាប្រទេសផ្សេងៗជាពិសេសនៅអឺរ៉ុបនោះ ប្រធានសហព័ន្ធឥណ្ឌូណេស៊ី មានគម្រោងបញ្ចូលកីឡាករសញ្ជាតិហុល្លង់៧នាក់នៅក្នុងក្រុម U20 របស់ឥណ្ឌូណេស៊ី។ ការធ្វើបែបនេះ គឺដើម្បីឱ្យក្រុម U20 ឥណ្ឌូណេស៊ី មានកម្រិតលេងខ្លាំង អាចប្រជែងជាមួយក្រុមដទៃបាន។
យ៉ាងណាមិញ ប្រភពនៅឥណ្ឌូណេស៊ី បានអះអាងថារហូតមកដល់ពេលនេះ២នាក់ក្នុងចំណោម៧នាក់ដែលពួកគេចង់បាននោះ យល់ព្រមចូលសញ្ជាតិឥណ្ឌូណេស៊ីហើយ។ ដោយឡែកនៅសល់៥នាក់ទៀត កំពុងចរចានៅឡើយ ដោយភាគីឥណ្ឌូណេស៊ីនឹងទៅចរចាជាមួយក្រុមគ្រួសាររបស់កីឡាករផ្ទាល់ដើម្បីសម្រេចការចូលសញ្ជាតិនេះ៕