ក្រុមជម្រើសជាតិកម្ពុជាក្រោមអាយុ២០ឆ្នាំបានចាប់ផ្ដើមហ្វឹកហាត់ហើយ ដើម្បីត្រៀមខ្លួនចេញទៅលេងពានរង្វាន់ AFC U20 CHAMPIONSHIP 2022 ដែលធ្វើឡើងនៅថ្ងៃទី១៤ ខែកញ្ញា ឆ្នាំ២០២២ ដល់ថ្ងៃទី១៨ ខែកញ្ញា ឆ្នាំ២០២២ នៅប្រទេសតាជីគីស្ថាន។
ជាការត្រៀមខ្លួនសម្រាប់ការប្រកួតសំខាន់កម្រិតអន្ដរជាតិនេះដែរ ក្រុម U20 កម្ពុជាម្សិលមិញនេះបានណាត់ក្រុមណាហ្គាវើល ដើម្បីសាកកម្លាំង និងផ្លាស់ប្ដូរបច្ចេកទេសគ្នាផងដែរ។ ដោយនេះជាការប្រកួតកម្ដៅសាច់ដុំមួយ ក្រោយពីក្រុម U20 កម្ពុជាបានប្រមូលផ្ដុំហ្វឹកហាត់អស់រយៈពេលជាង១សប្ដាហ៍មកហើយ។ ខណៈដែលសមាជិក២៣នាក់ចុងក្រោយនៅយប់មិញនេះ គឺចេញពីតាមបណ្ដាក្លឹបផ្សេង និងឃើញថាពួកគេក៏ចាប់ផ្ដើមលេងយល់ចិត្តគ្នាបណ្ដើរៗផងដែរ។
រំលឹកថាក្រុម U20 កម្ពុជាលេងពានរង្វាន់ AFC U20 CHAMPIONSHIP 2022 ខាងលើស្ថិតនៅពូលជាមួយក្រុម សិង្ហបុរី លីបង់ និងម្ចាស់ផ្ទះតាជីគីស្ថាន។ ការប្រកួតនោះដែរ នឹងយកលេខ១តាមបណ្ដាពូលឡើងដោយស្វ័យប្រវត្តិចំនួន១០ក្រុម ហើយយកលេខ២ល្អ៥ក្រុមផ្សេងទៀតឡើងទៅវគ្គបន្ដ៕