ខ្សែប្រយុទ្ធ Pierre-Emerick Aubameyang បានបង្ហាញខ្លួនជាលើកដំបូង ឲ្យក្លឹបតោខៀវ Chelsea កាលពីយប់មិញ ក៏ចំថ្ងៃប្រកួតពានរង្វាន់ UEFA Champions League តែក្លឹបមិនទទួលបានសំណាងល្អនោះទេ ដោយរងបរាជ័យ ០-១ ក្រោមថ្វីជើងម្ចាស់ផ្ទះ Dinamo Zagerb។
កីឡាករសញ្ជាតិហ្គាបុង បានពាក់អាវលេខ ៩ ឈរជើងលើទីលាន នៅជម្រើស ១១ នាក់ដំបូង ដល់នាទី ៥៩ ទើបប្តូរចេញជំនួសដោយកីឡាករវ័យក្មេង Armando Broja។ យ៉ាងណាកំឡុងពេលឈរជើងឲ្យ Chelsea នៅប្រកួតបើកឆាក Aubameyang ធ្វើមិនបានល្អនោះឡើយ ដោយអត្រាបញ្ជូនបាល់ជោគជ័យមានត្រឹម ៦៩ ភាគរយ ហើយមិនបានស៊ុតសូម្បីតែមួយជើង សំដៅទៅបង្គោលទីក្លឹបគូប្រជែង និងហួសចិត្តបំផុតគឺរត់ហួសជំហរបាល់ Offside ដល់ទៅ ៣ លើក។
ក៏ប៉ុន្តែអ្នកគាំទ្រចាប់អារម្មណ៍បុរសវ័យ ៣៣ ឆ្នាំ បែរជាពាក់ម៉ាសបិទមុខ ខុសពីសព្វមួយដង មិនថាតែការឈរជើងឲ្យ Barcelona ក៏បង្ហាញមុខពេញលក្ខណៈជាធម្មតា។ តើនេះគឺជាស្ទាយនៃការតុបតែងខ្លួន ឬបែបណា?
បើតាមសារព័ត៌មាន Goal បានបកស្រាយថា មូលហេតុដែល Aubameyang ពាក់ម៉ាសមុខកាលពីយប់មិញ គឺដោយសារតែបិទបាំង និងព្យាបាលត្រង់បញ្ហារបួសថ្គាម ក្រោយរងការវាយប្រហារប្រតាយប្រតប់ជាមួយក្រុមចោរ លួចចូលប្ល.ន់ផ្ទះរបស់លោកកាលពីថ្ងៃអាទិត្យសប្ដាហ៍មុន នៅឯទីក្រុងកាតាឡូញ៉ា ប្រទេសអេស្ប៉ាញ។
Aubameyang បានបញ្ជាក់កាលពីពេលកន្លងទៅថា៖ “នៅយប់ថ្ងៃអាទិត្យ មានករណីអំពើហិង្សា ចូលមកក្នុងផ្ទះរបស់ខ្ញុំ ហើយបានគំរាមក្រុមគ្រួសារ និងកូនៗ រួចលួចយករបស់មួយចំនួនចេញទៅ ពួកគេបានធ្វើឲ្យថ្គាមរបស់ខ្ញុំរបួស តែយ៉ាងណាវានឹងជាសះស្បើយក្នុងពេលឆាប់ៗ ហើយក៏អរគុណព្រះជាម្ចាស់ ដែលមិនមានអ្នកឯទៀតរងរបួសដល់រាងកាយ”។
ហេតុផលនេះហើយដែល Aubameyang បានត្រឹមចុះហត្ថលេខាឲ្យ Chelsea ហើយពុំបានចូលរួមលេងកាលពីប៉ះ West Ham កន្លងទៅ និងបានត្រឹមអង្គុយទស្សនាការប្រកួតប៉ុណ្ណោះ។ ក្រោយមកលោក Thomas Tuchel បានសហការជាមួយក្រុមគ្រូពេទ្យ ដើម្បីវាយតម្លៃអំពីស្ថានភាពរបួសថ្គាមរបស់កីឡាករ ទើបសម្រេចថា បំពាក់ម៉ាសលើផ្ទៃមុខមួយចំហៀងរបស់គេ គឺអាចអនុញ្ញាតឲ្យគេចូលលេងបានជាធម្មតា។
ពាក់ព័ន្ធនឹងរឿងម៉ាសមុខនេះដែរ កន្លងមកក៏ខ្សែប្រយុទ្ធខាងលើ ធ្លាប់ពាក់វាផងដែរ តែជាម៉ាសមុខអបអរ ដូចកាលពីដំបូងគ្រាឈរជើងឲ្យក្លឹបបារាំង Saint-Etienne គេពាក់ម៉ាសមុខ Spider-Man ដើម្បីជាការលា ទៅកាន់អតីតអ្នកចាំទីរបស់ក្លឹប លោក Jeremie Janot។
រំឭកបន្តិចថា នៅពាន UCL យប់មិញ សម្រាប់កីឡាករជំនាញជើងស្តាំ គឺខកខានតាំងពីរដូវកាល ២០១៧/១៨ គ្រានោះលេងឲ្យក្លឹប Borussia Dortmund លុះក្រោយៗមក ជាមួយការឈរជើងឲ្យ Arsenal និង Barcelona គឺបានត្រឹមលេងពាន Europa League ដល់តែមកបើកឆាកជាថ្មី ឲ្យ Chelsea នៅ UCL ក៏ស្រាប់តែស្គាល់បរាជ័យភ្លែត។ ប្រកួតបន្ទាប់របស់ក្រុមដឹកនាំដោយលោក Thomas Tuchel ពួកគេកំណត់ជួបក្លឹប Fulham នាវេលាម៉ោង ០៦:៣០ នាទីល្ងាចថ្ងៃសៅរ៍ ទី ១០ កញ្ញា មានផ្សាយផ្ទាល់លើទំព័រ CTS SPORT៕
ប្រភព៖ បរទេស