ក្រុម Down Town Sport របស់កម្ពុជាធ្លាក់ចេញពីពាន AFF Futsal Cup ហើយ ក្រោយពីប្រកួតចុងក្រោយចាញ់ក្រុមម្ចាស់ផ្ទះថៃ Hongyen Thakam ក្នុងលទ្ធផល ១១-២។
សម្រាប់ឆ្នាំនេះដែរ ក្នុងពានរង្វាន់ AFF Futsal Cup 2022 ក្រុមកម្ពុជាហាក់ធ្វើមិនបានល្អនោះទេ។ ពួកគេស្ថិតនៅពូលជាមួយក្រុម Bintang Timur Surabaya របស់ឥណ្ឌូណេស៊ី ក្រុម Perwira របស់ព្រុយណេ និងក្រុម Hongyen Thakam របស់ម្ចាស់ផ្ទះថៃ។ ដោយការប្រកួតបើកឆាកកន្លងទៅប៉ះក្រុម Bintang ពួកគេលេងចាញ់ក្នុងលទ្ធផល ១២-២។ ប្រកួតទី២ប៉ះក្រុម Perwira ក្រុមកម្ពុជាយកឈ្នះវិញក្នុងលទ្ធផល ៨-៤ ហើយប្រកួតចុងក្រោយក៏លេងចាញ់ក្រុមថៃ Hongyen ក្នុងលទ្ធផល ១១-២ ទៀត។
ដោយតាមលទ្ធផលនេះដែរ ក្រុមកម្ពុជាធ្លាក់ត្រឹមវគ្គចែកពូលហើយ ដោយឈរនៅចំណាត់ថ្នាក់លេខ៣។ នេះជាកំណត់ត្រាមិនល្អទេសម្រាប់ក្រុម Down Town Sport នាឆ្នាំនេះ ត្បិតអីកាលពី២ឆ្នាំមុន ពួកគេបានបង្កើតប្រវតិ្ដសាស្ត្រឡើងដល់វគ្គពាក់កណ្ដាលផ្ដាច់ព្រ័ត្រឯណោះ៕