លោក Spalletti គ្រូបង្វឹករបស់ក្រុម Napoli បាននិយាយថាអ្នកគាំទ្ររបស់ខ្លួននឹងស្រែកបំភ័យក្រុម Liverpool នៅរាត្រីនេះក្នុងការប្រកួតពានរង្វាន់ UEFA Champions League ។
ក្រុមជើងឯករង Liverpool នឹងចាប់ផ្ដើមការប្រកួតដំបូងនៅ UCL របស់ខ្លួននៅរាត្រីនេះ ដោយប៉ះជាមួយក្រុម Napoli របស់អ៊ីតាលី។ ដោយមុនការប្រកួតនេះដែរ លោក Spalletti គ្រូបង្វឹករបស់ក្រុម Napoli មើលឃើញថាក្រុមរបស់លោកនឹងធ្វើការធ្ងន់ ព្រោះ Liverpool ជាក្រុមល្អមួយនាពេលបច្ចុប្បន្ន បើទោះជាប៉ុន្មានប្រកួតមកនេះពួកគេមានបញ្ហាដោយសារកីឡាកររបួសច្រើនក៏ដោយ។
ទន្ទឹមគ្នានេះដែរ បុរសវ័យ៦៣ឆ្នាំខាងលើក៏ធានាឱ្យវិញផងដែរថាសម្រែកអ្នកគាំទ្រនៅកីឡដ្ឋានរបស់ក្រុម Napoli នឹងធ្វើឱ្យប៉ះពាល់ផ្លូវចិត្តរបស់សមាជិកក្រុម Liverpool មិនខាន។ លោក Spalletti បានអះអាងថា៖ “ខ្ញុំដឹងច្បាស់ថានៅរាត្រីនេះ សម្រែករបស់អ្នកគាំទ្រ Napoli អាចឮដល់ទឹកដី Anfield ឯណោះ។ ការរីករាយដោយសម្រែកអ្នកគាំទ្រ នឹងជួយដល់ក្រុមរបស់យើងបានច្រើន។ ពួកគេដឹងច្បាស់ថានឹងត្រូវធ្វើបែបណានៅរាត្រីនេះ”។
រំលឹកថាលោក Spalletti បានជួបគ្រោះថ្នាក់កាលពីពេលថ្មីៗនេះ ដែលធ្វើឱ្យលោកខកខានបង្វឹកក្រុមប៉ុន្មានថ្ងៃមកហើយ។ យ៉ាងណាមិញ ក្រោយពីត្រួតពិនិត្យល្អិតល្អន់ទៅ លោកនឹងអាចចូលមកដឹកនាំក្រុមបានវិញហើយ ដើម្បីតទល់ជាមួយក្រុម Liverpool ៕