លោក Thomas Tuchel បានអះអាងថាក្នុងក្រុម Chelsea នៅពេលនេះ សុទ្ធតែមានកំហុសឆ្គងគ្រប់កន្លែងទាំងអស់ ទើបបណ្ដាលឱ្យលទ្ធផលមិនគាប់ប្រសើរ។
ក្រុមតោខៀវ Chelsea បានបរាជ័យក្រោមថ្វីជើងក្រុម Dinamo Zagreb ក្នុងលទ្ធផល ១-០ សម្រាប់ការប្រកួតបើកឆាកវគ្គសន្សំពិន្ទុតាមពូលពានរង្វាន់ UEFA Champions League នៅយប់មិញនេះ។ ជាមួយលទ្ធផលលេងចាញ់នេះដែរ បានធ្វើឱ្យសម្ពាធកាន់តែកើនឡើងបន្ថែមទៀតទៅលើតំណែងអ្នកចាត់ការក្រុមរបស់លោក Tuchel ព្រោះលោកបានទិញកីឡាករថ្មីចូលច្រើននាក់ណាស់ តែលទ្ធផលវិញលេងចាញ់ទាំងនៅលីគ និងក្របខណ្ឌ Champions League។
ក្រោយពីចប់ការប្រកួតទៅ លោក Tuchel បានបង្ហាញអារម្មណ៍ថា៖ “នៅខណៈនេះគ្រប់យ៉ាងសុទ្ធតែបាត់បង់ទាំងអស់។ យើងត្រូវការពេលច្រើនដើម្បីពិនិត្យឡើងវិញ ហើយខ្ញុំក៏ត្រូវមើលលើតាក់តិចខ្លួនឯងដែរ។ ខ្ញុំខឹងខ្លួនឯង ខ្ញុំខឹងចំពោះទម្រង់លេងរបស់យើង។ យើងត្រូវការធ្វើឱ្យបានល្អជាងនេះ។ ខ្ញុំពិតជាភ្ញាក់ផ្អើលចំពោះទម្រង់លេងនៅថ្ងៃនេះ”៕