កីឡដ្ឋានខេត្តកំពង់ស្ពឺ នៅថ្ងៃទី៦ខែកញ្ញាឆ្នាំ២០២២នេះ ត្រូវបានប្រារព្ធពិធីបើកឱ្យប្រើប្រាស់ជាផ្លូវការហើយ ក្រោយចំណាយពេលសាងសង់តាំងពីឆ្នាំ២០២១មក។
កីឡដា្ឋនខាងលើនេះបានត្រូវបានបើកការដ្ឋានសាងសង់នៅថ្ងៃទី២១ ខែកុម្ភៈ ឆ្នាំ២០២១ និងបានបញ្ចប់ការដ្ឋានសាងសង់នៅថ្ងៃទី២១ ខែសីហា ឆ្នាំ២០២២ នេះ ដោយចំណាយថវិការ ៣,៥លានដុល្លា។ វាត្រូវបានសាងសង់លើផ្ទៃដីទំហំ ៤៣.៤០២ម៉ែត្រក្រឡា មានទីតាំងស្ថិតនៅតាមបណ្ដោយផ្លូវជាតិលេខ៤៤ ដែលមានចម្ងាយប្រមាណជាង ៤គីឡូម៉ែត្រ ពីផ្លូវជាតិលេខ៤ ក្នុងភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ។ កីឡដ្ឋានខេត្តកំពង់ស្ពឺ មានកន្លែងអង្គុយចំនួន ៣០០០កៅអី និងទីតាំងសម្រាប់ភ្ញៀវ VIP។ បងប្អូនអាចអង្គុយទស្សនាការប្រកួតបានដោយផាសុកភាព ហើយក៏អាចឱ្យបងប្អូនមើលឃើញទេសភាពដ៏ស្រស់ត្រកាលមួយផ្នែកនៃខេត្តកំពង់ស្ពឺផងដែរ។
សមិទ្ធផលកីឡដ្ឋានខេត្តកំពង់ស្ពឺ ជាគំនិតផ្ដួចផ្ដើមរបស់ ឯកឧត្តម ហ៊ុន ម៉ានី តំណាងរាស្ត្រមណ្ឌលខេត្តកំពង់ស្ពឺ។ កសាងកីឡដ្ឋាននេះឡើង ក្នុងគោលបំណងចូលរួមចំណែកជាមួយរាជរដ្ឋាភិបាលក្នុងការអភិវឌ្ឍវិស័យកីឡា ឱ្យកាន់តែរីកចម្រើនឆ្ពោះទៅការធ្វើជាម្ចាស់ផ្ទះនៃការប្រកួតកីឡាស៊ីហ្គេម ឆ្នាំ២០២៣ ខាងមុខនេះផងដែរ។