Premier League រដូវកាលនេះ ពោរពេញដោយការប្រកួតប្រជែង ហើយក៏មានរឿងរ៉ាវនឹកស្មានមិនដល់ជាច្រើនបានកើតឡើង។ មួយក្នុងចំណោមនោះ ងាកទៅស្ថានការណ៍ Manchester United ក៏ហាក់មានការផ្លាស់ប្ដូរលឿនត្រឹមមួយរំពេចផងដែរ។
កាលពី ២ ជុំដំបូង ទល់ Brighton និង Brentford ក្លឹបបិសាចក្រហម ធ្វើមិនបានល្អទាល់តែសោះ ពោលចាញ់ទាំង ២ ធ្លាក់ឈ្មោះទៅបាតតារាង ខកខានកើតមានច្រើនឆ្នាំ។ លុះដល់ប្រកួតជុំទី ៣ ទល់ Liverpool រៀងមក រហូតតមកដល់ការប៉ះ Arsenal ចុងក្រោយនេះ ក្លឹបបែរបង្កើតលទ្ធផលមិនគួរឲ្យជឿ នោះគឺអាចយកឈ្នះជាប់ៗគ្នាដល់ទៅ ៤ លើក ហើយរបូតតែ ២ គ្រាប់គត់។
ហេតុផលចម្បង នាំឲ្យក្លឹបម្ចាស់ដី Old Trafford មានការផ្លាស់ប្តូរមកចំណាត់ថ្នាក់ល្អ ឆាប់រហ័សបែបនេះ ក៏ដោយសារតែចន្លោះប្រហោងដែលអ្នកចាត់ការសញ្ជាតិហូឡង់ បានរកឃើញ និងកែតម្រូវទាន់ពេលវេលា នោះគឺតំបន់ការពារ និងសម្រួចបន្ថែមនៅតំបន់ប្រយុទ្ធ។
Ten Hag មើលឃើញថា ប្រព័ន្ធ ៤-៣-៣ មិនអាចយកជាការបានឡើយ ហើយក៏ប្តូរមកតេស្តប្រព័ន្ធ ៤-២-៣-១ តែការសាកល្បងដំបូង ចាញ់ Brentford ស្ពឹកមុខ ដល់ ៤-០។ ប្រកួតនោះហើយ ជាពេលដែលធ្វើឲ្យបុរសវ័យ ៥២ ឆ្នាំមានការយល់ឃើញ ថាការចាប់គូរវាង Lisandro Martinez និង Harry Maguire ជាការសម្រេចចិត្តខុសរបស់ខ្លួន ហើយផ្លាស់មកដាក់កីឡាករបារាំង Raphael Varane ឲ្យចូលលេងជំនួសវិញ។
ចាប់តាំងប្រកួតទល់ Liverpool ជញ្ជាំងការពារក្រោម របស់ United ដែលមានកីឡាករបារាំង&អាហ្សង់ទីនសហការគ្នា គឺឃើញថា ទទួលបានផលល្អ គ្រប់ការប្រកួតទាំងអស់ តែវាក៏អរគុណដល់ការអមស្លាបសងខាងយ៉ាងមានប្រសិទ្ធភាពនៃ Diogo Dalot និង Tyrell Malacia ផងដែរ។
ខណៈដែលតំបន់បម្រើ Ten Hag មើលមិនឃើញចន្លោះអ្វីត្រូវកែតម្រូវឡើយ ព្រោះ Scott McTominay គេកំពុងធ្វើបានល្អ រីឯ Bruno Fernandes ក៏មិនទាន់រកឃើញអ្នកដែលគួរមកជំនួស ហើយពេលចុងក្រោយ កាន់តែធ្វើឲ្យលោកមើលឃើញច្បាស់ អំពីទេពកោសល្យនិងគុណភាពរបស់ខ្សែបម្រើដាណឺម៉ាក Christian Eriksen។
ប៉ុន្តែចូលដល់តំបន់ប្រយុទ្ធ United ពេលនេះ កំពុងមានតែមានទំនុកចិត្ត ជាពិសេសក្រោយការមកដល់របស់ខ្សែប្រយុទ្ធស្លាប Antony។ បុរសសញ្ជាតិប្រេស៊ីល ក៏ទើបតែបើកគណនីគ្រាប់បាល់ឲ្យបិសាចក្រហមកាលពីយប់មិញ ហើយក៏ទទួលបានការសរសើរមិនដាច់ពីមាត់ ពីអ្នកចាត់ការ ថាពូកែក្នុងការប្រើប្រាស់ល្បឿន និងភាពច្នៃប្រឌិតនៃចង្វាក់លេងលើទីលាន។
យុទ្ធសាស្រ្តដែលគេចាប់អារម្មណ៍ គឺ Ten Hag លែងប្រើ Cristiano Ronaldo នៅជម្រើស ១១ នាក់ដូចបណ្តាអ្នកចាត់ការដទៃ ហើយបែរដាក់កីឡាករព័រទុយហ្គាល់ឲ្យអង្គុយបម្រុង សឹមលេងនៅកំឡុងតង់ទី ២។ ជម្រើសឈុតតំបន់ប្រយុទ្ធដែលអតីតគ្រូ Ajax កំពុងជឿទុកចិត្តបំផុតពេលនេះ មាន Marcus Rashford, Antony និង Jadon Sancho ដែលប្តូរពីស្លាបស្តាំ មកលេងនៅស្លាបឆ្វេងវិញ។
គិតត្រឹមជុំទី ៦ នៅតារាងលីគកំពូលអង់គ្លេស Man Utd បានរំកិលឡើងមកឈរលេខ ៥ មាន ១២ ពិន្ទុ ចាញ់ ៣ ពិន្ទុគត់ធៀបនឹងក្លឹបកំពូលតារាង Arsenal។ កាលបរិច្ឆេទប្រកួតបន្ទាប់ ក្លឹបត្រូវងាកទៅជំនួបនៅ Europa League ជាការប៉ះគ្នាជុំទី ១ វគ្គចែកពូល កំណត់ជួប Real Sociedad នាវេលាម៉ោង ០២:០០ នាទីរំលងអាធ្រាត្រ ឈានចូលថ្ងៃសុក្រទី ៩ កញ្ញា មុនបន្តការលេងនៅ PL ជួបម្ចាស់ដី Crystal Palace នាថ្ងៃអាទិត្យ៕
ប្រភព៖ បរទេស