ត្រកូលគ្រួសារ Glazer ដែលជាម្ចាស់ភាគហ៊ុនធំ ក៏រាប់ជាម្ចាស់ក្លឹប Manchester United ត្រូវបានគេរាយការណ៍ ថារៀបចំចង់លក់ក្លឹបចេញហើយ បន្ទាប់ពីដឹកនាំអស់រយៈពេល ១៧ ឆ្នាំកន្លងមក។ លទ្ធផលចុងក្រោយហាក់មានការតវ៉ា មិនអស់ចិត្ត និងប្រឆាំងចង់ឲ្យ Glazer ចុះចេញ មិនថាតែអ្នកគាំទ្រ និងសូម្បីអតីតកីឡាករមួយចំនួន ដូចលោក Gary Neville។
ទោះជាយ៉ាងណា Glazer ជារឿយៗ មិនបង្ហាញចេតនាចង់លក់ឲ្យដាច់ផឹងៗទេ ហើយតែងតែអែអង់ ដ្បិតមានសេដ្ឋីធំៗក្នុងលោក ទាក់ទងមកបន្តកន្ទុយគ្នា។ ឥឡូវតាមសារព័ត៌មាន Daily Mail ចុះផ្សាយថា ត្រកូល Glazer ក៏សុខចិត្តដើរចេញពីតំណែងគ្រប់គ្រងក្លឹបទាំងមូលហើយ តែលុះត្រាទទួលបានសំណើនៃការទិញយក តម្លៃ ៣,៧៥ ពាន់លានផោន ឬប្រហែល ៤,៣០ ពាន់លានដុល្លារ។
ទំហំនេះ រាប់ជាក្លឹបមានតម្លៃថ្លៃបំផុតក្នុងលោកនៅពេលបច្ចុប្បន្ន ហើយក៏ជឿថាម្ចាស់បន្ទាប់ ភាគរយច្រើនប្រាកដជាព្រះអង្គម្ចាស់ណាមួយ នៅប៉ែកខាងអារ៉ាប៊ីសាអ៊ូឌីត ឬអារ៉ាប់រួមជាក់ជាមិនខាន។ រំឭកឲ្យដឹង United គិតត្រឹមជុំទី ៦ នៅ PL កំពុងឈរលេខ ៥ មាន ១២ ពិន្ទុ នៅចាញ់ ៣ ពិន្ទុគត់ធៀបនឹងក្លឹបកំពូលតារាងគឺ Arsenal៕
ប្រភព៖ Daily Mail