លោក Brendan Rodgers នៅតែមានទំនុកចិត្តថានឹងអាចស្រោចស្រង់ក្លឹប Leicester City ឱ្យប្រសើរឡើងវិញបាន បើទោះជាបរាជ័យផ្ទួនៗដល់ទៅ៥ប្រកួតមកហើយក្ដី។
ក្រុម Leicester City កាន់តែដុនដាបទៅមែនទែនហើយនារដូវកាលនេះ។ ពួកគេបានបរាជ័យក្រោមថ្វីជើងក្រុម Brighton ដល់ទៅ ៥-២ ឯណោះសម្រាប់ការប្រកួតសប្ដាហ៍ទី៦នេះ។ ខណៈដែលវាជាការប្រកួតដែលពួកគេចាញ់៥ប្រកួតជាប់គ្នាក្នុងចំណោម៦ប្រកួតនៅដើមរដូវកាលនេះផងដែរ។ អ្នកគាំទ្រក្រុម Leicester City ក៏ចាប់ផ្ដើមចង់ឃើញក្លឹបបណ្ដេញអ្នកចាត់ការ Bredan Rodgers ចេញបណ្ដើរ២ហើយដែរ។
តែទោះជាយ៉ាងនេះក្ដី អតីតអ្នកចាត់ការក្រុម Liverpool ខាងលើនៅតែមានទំនុកចិត្តដដែល។ លោកបានអះអាងថានៅប្រកួតបន្ទាប់ខាងមុខ ក្រុម Leicester City នឹងប្រសើរឡើងវិញមិនខាន។ ដោយលោកជឿជាក់ថាកូនក្រុមក៏មានបំណងនិងប្រឹងប្រែងដូចគ្នា។ លោកមិនដែលបាត់ទំនុកចិត្តក្នុងការដឹកនាំក្រុមនោះទេ ហើយលោកក៏មិនខ្លាចក្នុងការដែលត្រូវគេបណ្ដេញចេញផងដែរ៕
