កាលពីថ្ងៃ៣០ខែសីហា ឆ្នាំ២០២២កន្លងទៅ មានដំណឹងមកថាមានក្រុមចោរបានចូលទៅផ្ទះរបស់ខ្សែការពារ Carvajal របស់ក្រុម Real Madrid ដើម្បីលួចទ្រព្យសម្បត្តិ។
ផ្ទះរបស់ Carvajal ដែលមានដំណឹងថាមានក្រុមចោរចូលប៉ុនប៉ងលួចយកទ្រព្យសម្បត្តិនោះនៅBoadilla del Monte ដែលជាតំបន់ក្បែរទីក្រុង Madrid ប្រទេសអេស្ប៉ាញ។ កីឡាករអេស្ប៉ាញរូបនេះមិនបាននៅផ្ទះទេ ប៉ុន្តែមានក្រុមការងាររបស់គេនៅនិងបានឃើញចោរដោយផ្ទាល់ភ្នែក។ ដោយក្រុមចោរដែលត្រូវបានគេដឹងថាមានគ្នា៣នាក់នោះ បានព្យាយាមគាស់ផ្ទះដើម្បីចូលទៅលួចរបស់ ប៉ុន្តែសំណាងមានប្រព័ន្ធសុវត្ថិភាពនៅផ្ទះ និងបានពន្លឺសំឡេងឡើង ធ្វើឱ្យក្រុមចោរដឹងខ្លួននិងគេចអស់ទៅ។ Carvajal ក៏បានដាក់ពាក្យបណ្ដឹងចំពោះករណីនេះផងដែរ។
រំលឹកថានៅអេស្ប៉ាញករណីចោរចូលផ្ទះលួចរបស់នេះ មានច្រើនមែនទែន។ ជាក់ស្ដែងមុនករណី Carvajal នេះ ក៏មានករណីរបស់ខ្សែប្រយុទ្ធ Aubameyang ផងដែរ។ ដោយករណីនោះគឺក្រុមចោរបានចូលទៅប្លន់ក្នុងផ្ទះរបស់គេតែម្ដង ហើយក៏បានវាយធ្វើបាបកីឡាកររូបនេះផងដែរដោយរងរបួសថ្គាម។ តែសំណាងល្អ មិនមានគ្រោះថ្នាក់ខ្លាំងអ្វីនោះទេ៕