នៅថ្ងៃចុងក្រោយនៃការដោះដូរកីឡាករ ក្រុម Chelsea បានចំណាយប្រាក់១២លានផោនដើម្បីទិញយកខ្សែប្រយុទ្ធ Pierre-Emerick Aubameyang ពីក្រុម FC Barcelona ។
Aubameyang បានចាកចេញពីក្រុម Arsenal ទៅលេងនៅក្រុម Barcelona នាខែកុម្ភៈដើមឆ្នាំ២០២២នេះ។ លេងបានត្រឹមពាក់កណ្ដាលរដូវកាលឱ្យក្រុមអ្នកមានបុណ្យប៉ុណ្ណោះ នៅពេលនេះរូបគេក៏ត្រូវលក់ចេញវិញ ដោយក្រុម Chelsea ជាអ្នកចាប់អារម្មណ៍នាំយកមកក្នុងតម្លៃខ្លួន១២លានផោន។ ដោយការត្រលប់មកវិញនេះដែរ ត្រូវបានសាមីខ្លួនអះអាងថាដោយសារភារកិច្ចនៅក្របខណ្ឌ Premier League មិនទាន់ចប់នោះទេ។
អតីតខ្សែប្រយុទ្ធ Dortmund ខាងលើនេះក្លាយជាកីឡាករទី៦ ដែលក្រុម Chelsea នាំចូលនារដូវកាលដោះដូរកីឡាករនេះ ដោយចំណាយប្រាក់អស់ប្រមាណជា២៨០លានផោនហើយ។ ដោយនេះជាការចំណាយដំបូងរបស់លោក Todd Boehly ដែលទើបចូលកាន់កាប់ក្លឹបតោខៀវ Chelsea ៕