សហព័ន្ធកីឡាបាល់ទះកម្ពុជា នឹងបង្កើតពានរង្វាន់ជាច្រើនបន្ថែមទៀតនាចុងឆ្នាំនេះ និងដើមឆ្នាំក្រោយដើម្បីសំរួចសមត្ថភាពកីឡាករត្រៀមខ្លួនស៊ីហ្គេមឆ្នាំ២០២៣ខាងមុខ។
បើតាមការបញ្ជាក់របស់ឯកឧត្ដម ស សុខា អនុប្រធានសហព័ន្ធបាល់ទះកម្ពុជា បានបញ្ជាក់ថាក្រោយពីចប់ស៊ីហ្គេមនៅវៀតណាមមក ពានរង្វាន់បាល់ទះនៅកម្ពុជាបានបង្កើតឡើងជាបន្ដបន្ទាប់។ ខណៈដែលគោលដៅនៃការបង្កើតពានរង្វាន់ទាំងនេះ គឺដើម្បីឱ្យកីឡាករមានការប្រកួតទៀងទាត់ និងត្រៀមខ្លួនបានរួចរាល់សម្រាប់ការប្រកួតនៅឆ្នាំ២០២៣ខាងមុខ ដែលកម្ពុជានឹងធ្វើជាម្ចាស់ផ្ទះស៊ីហ្គេម។
ឯកឧត្តម ស សុខា បានបញ្ជាក់ថា៖ “យើងគិតថា ២០២៣ អាចនៅសល់ពេលវេលាច្រើន យូរ ប៉ុន្តែស្អែកខានស្អែក យើងកុំមើលរំលងពេលវេលា ពីព្រោះឥឡូវនេះ ប្រទេសជិតខាងរបស់យើង តាមរយៈការដែលយើងបានលេខ៣ ប្រទេសមួយចំនួន ក៏បានប្ដូរគ្រូ ប្រទេសមួយចំនួន ក៏បានរើសកីឡាករថ្មីតែម្ដង ដើម្បីត្រៀមចូលរួមប្រកួតស៊ីហ្គេម២០២៣។ អ៊ីចឹងហើយ ខ្ញុំគិតថា បើយើងខិតខំប្រឹងប្រែង យើងនឹងមានគុណភាពខ្ពស់”។
រំលឹកថាកម្ពុជា ទើបបញ្ចប់ការប្រកួតពានរង្វាន់បាល់ទះ ២ប្រភេទផ្សេងគ្នាទេ។ ដោយសប្ដាហ៍មុនបញ្ចប់ការប្រកួតបាល់ទះ៤ទល់នឹង៤ ធ្វើឡើងនៅរាជធានីភ្នំពេញ ដោយឆ្លងកាត់ការប្រកួតជាច្រើនសប្ដាហ៍។ ខណៈដែលកាលពីខែមិថុនាកន្លងទៅ ក៏ទើបចប់ការប្រកួតបាល់ទះមួយទៀតគឺពានសម្ដេច ស ខេង ដែលមានក្រុមចូលរួមដល់ទៅ២១ក្រុមឯណោះ៕