ខ្សែបម្រើ Fabio Carvalho រកបានគ្រាប់បាល់ចុងម៉ោង៩០+៨ ជួយក្រុមហង្សក្រហម Liverpool យកឈ្នះលើក្រុម Newcastle United ក្នុងលទ្ធផល ២-១ នៅយប់មិញនេះ។
ក្រុម Liverpool ប៉ះជាមួយក្រុម Newcastle United នេះមិនមែនជារឿងងាយស្រួលយកឈ្នះដូចប្រកួតមុននោះទេ។ ជាក់ស្ដែងក្នុងការប្រកួត ក្រុមភ្ញៀវ Newcastle ជាអ្នករកគ្រាប់បាល់នាំមុខបានថែមទៀត ដោយកីឡាករចំណូលថ្មី Isak នៅតង់ទី១នាទី៣៨។ ខណៈដែលគ្រាប់បាល់តាមស្មើក៏រកបានដោយ Firmino វិញនៅនាទី៦១។ ស្របពេលគ្រាប់បាល់ជ័យជម្នះវិញ កើតមានឡើងនៅនាទី៩០+៨ ដោយវាកើតចេញពីខ្សែបម្រើ Carvalho ជាអ្នកសម្រេចទីបាន។
ដោយសារតែការប្រកួតតឹងតែងនេះហើយ ទើបបានជាលោក Jurgen Klopp និយាយក្រោយចប់ការប្រកួតថានេះនឹងក្លាយជាប្រកួតមួយដែលអ្នកគាំទ្រចង់ចាំមិនខាន។ មានរឿងជាច្រើនបានកើតឡើងទាំងលើទីលាន និងក្រៅទីលាន តែយ៉ាងណាក្រុម Liverpool បានបង្ហាញឱ្យឃើញពីការចង់ឈ្នះការប្រកួតរបស់ពួកគេ។ វាជាការប្រកួតមួយដែលគ្រប់គ្នាឃើញច្បាស់ថា Liverpool មិនដែលបោះបង់ក្ដីសង្ឃឹមចោលនោះឡើយ៕